TURA: Tura jillani Babupara-o donggipa Garo Labor Corps-ni Cenotaph-ko gital dake rikpiltaina tender on·anio niam gita ong·jaenga ine A·chik Youth Welfare Organisation (AYWO) matnangatenba, ia kamna tender on·aniko nipiltaichina a·dokni Urban Affairs Minister-na sedoataha.
Ia Cenotaph-ko gital dake rikpiltaianina sorkari, gong krorgni tangkarangko chamahachim indiba ia cenotaph-ko gital dake rikpiltaiani bidingo Garo Hills-ni dingtang dingtang dolrang aro manderang baksa agangrikchenggija cenotaph-ko pe·galahani gimin a·dok sorkari aro district administration jegalgrimako man·ahachim.
Indake ong·engon, AYWO-ni parakatani gitade, ia cenotaph-ko gital dake rikpiltaina manchiani bidingo uamang RTI ka·e am·sandion, ia kamna tender galgipa sakgittam contractor-rangoni saksa Dhurup Prasad, tender notice-o on·a gita October 18-an bon·kamgipa tarik ong·genchimoba, jasani ja·man 2024 bilsini November 14 tarikosa ‘earnest money’-ko deposit ka·skaaha ine ma·sina man·aha.
Ia contractor-ni lekkarango Tura Municipal Board (TMB) Chief Executive Officer (CEO)-ni maming seal ba soirangba dongja aro ian ia project-na tender on·anio chanchichipna nanganiko ong·katdapataha ineba AYWO parakataha.
“Iandakgipa kamrangko nikna man·aniara niam pe·aniko, kamo dongnuna jotton ka·aniko aro contract on·anio mikkang niteani donganiko mesokani ong·aha,” ine AYWO parakataha.
Indake ong·engon, ia project-na tender on·aniko name sandiroke nichina aro sandirokani kamrang matchotkujaskal kamrangko dontongatchengchina gitaba AYWO dabiangaha.
Sandirokanio ong·gija dakanirangko rim·a man·genchimode jak donggipa official-rangni kosako rakgipa ja·kurangko de·china gitaba AYWO dabiangaha.