SHILLONG: Ia sal somoirango wachi sokengahani gimin State Disaster Management Authority aro dingtang dingtang department-rangni tarisamsoanirangko nina gita Sukrobar salo a·dokni Chief Minister Conrad K Sangma, video conference gita tom·aniko ong·atangaha aro mikka balwa ta·rakanirangchi nangchakeanirangko man·enggipa nokdangrangna ta·raken nanga gita dakchakanirangko on·china district administration-rangko aro dingtang dingtang department-rangko ge·etangaha.
Ia tom·anio a·dokni Chief Minister baksana, Deputy Chief Minister Prestone Tynsong, Health Minister Ampareen Lyngdoh, Chief Secretary DP Wahlang aro dingtang dingtang department-ni official-rangba bak ra·angtokaha.
Ia tom·anio dingtang dingtang a·jani deputy commissioner aro officer-rangba video conference gita bak ra·angtokaha.
Dingtang dingtang department-rangni wachina tarisamsoanirangko nipilangengon, mikka balwarang ta·rakanio dakchakanirangko on·na gita dingtang dingtang department aro dolrangni ku·mong nangrime kam ka·aniko nangchongmota ine a·dokni Chief Minister aganaha.
A·sel ong·ani somoirango, neng·nikanirangko chagrongna nangenggipa manderangna cha·ani ringani aro dongchakanirangko ta·raken on·china gitaba Chief Minister didiangaha.
Iandakgipa somoirango, Block Disaster Management Committee-rang, Village Disaster Management Committee-rang aro Village Executive Committee-rangni dakna nanggni aro bak ra·na nanganiko janapangengon, iandakgipa dolrang baksa tom·anirangko ong·atjringchina aro dingtangmancha niam aro ge·etanirangko on·china gita Chief Minister, dingtang dingtang a·jani deputy commissioner-rangko ge·etangaha.
Mikrake dongna nangani gimin songni nokni manderangna songbadrango aro dingtang dingtang news channel-rango u·iatchina gitaba Chief Minister ku·pattiangaha.
Pilak biaprangon biapni kri a·sel ong·anirangko nikna man·ronga ine janapatengon, Garo Hills-o chi banani aro a·a rurongani baksana Jaintia Hills a·jarangoba a·a ruronganirangko nikna man·ronga ine IMD-oni u·iatsamsoanirangko man·ahaon, iandakgipa biaprango mikrake dongchina u·iatna nanga ine Sangma aganaha.
Iandakgipa a·selrangona mock drill-rangko ong·atjringchina gitaba Chief Minister ku·pattianiko on·angaha.