TURA: Tura-ko Meghalaya-ni Winter Capital dakchina dabianiko bilakatna A·chik State Peoples’ Front (ASPF), Garo Hills a·jani dingtang dingtang jolrango campaign ka·enga aro ia dabianio manderangko chakpachina mol·molanga-ha. Sonibar salo West Garo Hills-ni Balachanda songni playground-o campaign-ko ka·angaha.
Jeon Balachanda-ni a·king Nokma, Chandalkona a·king Nokma -Rajabala aro A·chik Progressive Approach (APA) Rajabala Unit-ni president aro gipinrang bakko ra·angaha aro uamangba Tura-ko winter capital dakchina dabianiko chakpana aganaha.
Uandake ASPF-ni Secretary Bernita Marak, koborna u·iataon, ASPF, Tura-ko winter capital dakchina dabianiko chu·sokatna raken jotton ka·enga, manderangna Tura-ko winter capital songaode maidakgipa namgnirangko donga, aro iara baditan gamchata, iarangni gimin u·iatenga, jedako manderang chingni dabianio chakpagen aro chingni dabiani bilak-batgen. Iana chinga dingtang dingtang jolrango campaign-rangko aro meeting-ko ong·atenga. Uandake chingni re·mik-kanganio bang·arangni chakpaaniko man·enga. Mikkangchi May 10 tariko Raksamgre-o campaign ka·ange manderangna Winter Capital-na dabiani gamchataniko u·iatgen.
Minggipin ASPF, Chief Minister Conrad K Sangma-ko Winter Capital Committee, gimik stakeholder-rang, civil society organisations aro GSMC baksa ta·raken tom·e chanchirmaniko dakchina mol·molaha.
