Ri-Bhoi: Champengatako man·gipa Hynniettrew National Liberation Council (HNLC) bobil dolni bading chiwale cha·enggipa jolni manderangko aro sorkario kam ka·enggiparangoniko ka·mikkenate tangka paisa ra·sekdraenganiko kobor man·ani ja·man Ri-Bhoi police-rang uamangni kosako sandina a·bachengataha, indake uamangni sandimitingo badingchiwale cha·enggipa saksa mandeoniko tangka ra·chakengmitingko chanchichipgipa HNLC bolbil dolni Pyndapbok Makri ko rim·na man·aha, indake rim·ako man·gipa saksao sing·sandie am·sanditaion Umtyra-oniko Lary Pynkmen Nongshli minggipa saksako East Jaintia Hills Police rim·na man·aha. Uamangni kosako police-rang mokordoma ka·angaha. East Jaintia Hills-ni Superintendent of Police ni u·iatani gitade Bangladesh-oni bolbil dake chakatgipa dolrang a·jani badingchiwale cha·enggiparangoniko whatsapp ranggita tangka dabienga aro on·jagenchimode nokdangni manderangko so·ote galna ba maiba namgijako dakna ka·mikkenate message ka·enga, uni ja·man uamang tangka paisarangko ra·na gita apsan jolni manderangkon tangka paisarangko ra·na watenga ian a·jani chadamberangko namgija kamona ga·akatna dakenga ine SP u·iatangaha.
Apsan dake Ri-Bhoi police drugs badingsrukgipa sakgittamko rim·a. Sriksrik kobor man·e Ri-Bhoi police-rang a·tam 9:45 bajimango NH 51 Guwahati-Shillong rama Nongthymai rama bibrao Maruti Baleno (Registration No. ML 05AB-9902) gariko dondikate am·sandion 10.9 gram Heroin-ko ra·sekna man·aha. Rim·a man·gipa manderangara Wellborn Khongjoh, Fedrick Kharkrang, aro Pascal Kharkrang ong·a. Uamangni kosako mamla segate am·sandiangkuna police custody-o donataha.
