TURA: Garo Hills-ni Tribal contractor-na on·gimin kamrangko den·galpila ine A·chik Youth Welfare Organisation (AYWO) matnangatenba, iani bidingo sandirokchina aro ia contractor-rangna kamrangko on·piltaichina a·dokni Deputy Chief Minister aro Urban Affairs Minister Sniawbhalang Dhar-na sedoataha.
Iani bidingo Urban Affairs Minister-na badi ka·e sedoatengon, sak 13 Tribal contractor-na on·gimin kamrangko maming u·iatsamsoani gri den·galpilahani a·sel ia contractor-rangna namen neng·nikanirang ong·aha ine AYWO-ni secretary Changkey R Marak parakataha.
Ia Tribal contractor-rangna on·gimin kamrangko den·galpilaniara department-ni gita kamrangko on·anio kakket ong·ani dongama dongja uko sing·na nangao ga·akenga ineba Marak parakataha.
“Mingsa aiao inmananide, ia kamrangna chamgimin tangka paisarangkoba den·galpilaha aro iani a·selan an·tangtangna on·gimin kamrangko matchotangenggipa contractor-rangnade gimaani ong·enga,” ine AYWO-ni secretary parakataha.
Non-Tribal contractor-rangna kamrangko on·anio, Tura Municipal Board-o Executive Engineer-ni kamko ka·enggipa mandean jak donga ine matnangatskaengon, Tribal contractor-na on·gimin kamrangko den·galpile ia kamrangko Tribal ong·gijagipa contractor-rangna on·skaaniara ra·chakna man·gijani ong·a ine AYWO parakataha.
Iani bidingo ta·raken sandirokenba, duko ga·akenggipa contractor-rangna kamrangko on·piltaichina, kam mingprakna chamgipa tangka paisarangni gimin talataniko on·china aro ong·gija dakanio jak donggipa official-rangni kosako rakgipa ja·kurangko de·china gitaba AYWO-ni secretary, a·dokni Urban Affairs Minister-ko didiataha.