SHILLONG: Air Raid ba aircraft-rangchi chadrapani somoirangona manderangko tarisamsona aro mikrakatanirangko on·na gita da·al Budbar attam 4:00 baji dipet, a·dokni pilak biaprangon Mock Exercise ba dake nianiko ong·atenga ine Civil Defence & Home Guards Directorate-ni Senior Staff Officer aro Additional PRO Paul Shylla u·iataha.
Iani bidingo u·iataniko on·angengon, Budbar attamni 6:30 bajio Air Raid siren-ko gam·athen aro uni ja·man joljol minute-gnina Black Out Exercise ba bijolirangko kimite dake nianiko ong·atanggen ine Shylla talataniko on·angaha.
Ian Air Raid-na dake nianisan ong·engani gimin manderangko kenjagokjachina gitaba Civil Defence & Home Guards-ni official didiataha.
Indake ong·engon, ‘Black Out Exercise’ ba bijoli kimite dake nianiko ong·atani bidingo, Civil Defence-ni Joint Director MK Sangma, talataniko on·ataha.
“Ian chu·gimik bijoliko kimitgen ong·ja indiba dakgrikani somoirango, mongsongbate aircraft-rangchi goe chadrapani somoirango ong·a obostarangko ma·sie ra·na dake nianisan ong·enga. Dakgrikani somoirango siren-ko gam·aton pangnan bijolirangko kimitna nangani giminsa ia Mock Exercise-oba siren-ko gam·aton bijoliko minute-gnina kimitna miksongenga,” ine Sangma aganaha.
Ia bakkandikbegipa somoio nokdang ge·antiko bijoli kimitchina u·iatnade man·jawa ine nikesa minute-gninamangmang bijoliko kimitchina uamang MeECL-ko mol·molatskaaha ineba Civil Defence-ni Joint Director parakataha.
Bijoliko minute-gnina kimitgenchimoba, ia mock exercise-ko dakanio, gari gorarangni aro manderangni re·ruraaniode maming champengani dongjawa.
A·songni pilak biaprangon ia Mock Exercise-ko ong·atchina India sorkari ge·etaniko on·manahani giminsa Meghalaya a·dokoba iako dakna nangenga ineba Sangma aganaha.