SHILLONG: India aro Pakistan a·songni gisepo so·sojengjeng ong·engani gimin a·songna kenchakna nanganirang dongjana gita Pakistan a·songo tarigipa ‘content’-rangko watjachina gita India sorkari, pilak OTT platform-rang, media-rang aro digital-ni kamrango jak donggipa dolrangna ge·etaniko on·ataha.
Ia u·iataniko Information Technology (Intermediary Guidelines & Digital Media Ethics Code) Rules 2021-ni ning·o, mongsongbate online gita content-rangko watenggipa publisher-rangna Code of Ethics-ko on·gipa IT Rules-ni Part II ning·o on·ataha. Ia niamara, India a·songni jakgitelani, naljokani, ba a·song gipin baksa nangrimanio maming nangchakeanirang donggipa video-rangko watanio, simsakna nanganiko on·anian ong·a.
India sorkarini u·iatani gitade, je content-rangan, India a·songni gipin a·songrang baksa meli nangrimaniko pe·ani, ding·chaogrikataniko ra·baani aro manderangna so·sojengjeng ong·aniko ra·bagenchim, iandakgipa content-rangko name nichengna nanggen aro skatang watna man·jawa. IT Rules-ni 3(1)(b)-ni bidingo janapatengon, ia niamni ning·o India a·songni ku·mong nangrimani, mikkim, aro chel·chakanina kenchakna nanganirang donggenchimode, uandakgipa content-rangko watjachina India sorkari u·iataha.
Re·anggipa April jani 22 tariko, Kashmir a·dokni Pahalgam-o bobil dake chakatgipa manderangni silchidarerangchi goe chadrapanio sak 26 tourist-rang so·otako man·ani ja·man a·song damgnini gisepo so·sojengjeng ong·anirangko nikna man·engani gimin ia ge·etaniko India sorkari on·angaha.