SHILLONG: Gitcham Congress sorkarini somoio Hynniewtrep National Liberation Council (HNLC) bobil dolna tangka paisarangko on·e dakchaka ine da·o a·dokni Deputy Chief Minister ong·enggipa Sniawbhalang Dhar-ni kosako matnangenggipani gimin Meghalaya Democratic Alliance (MDA)-o bakrimenggipa dolrangni gisepo apsan chanchirimchina gita a·dokni Bharatiya Janata Party (BJP) ku·pattianiko on·angaha.
“Matnangako man·enggipa Dhar-ba sorkarion ong·a aro an·ching MDA sorkarini gita iani bidingo chanchirimna nangenga. Jeba matnange ronade man·aia indiba sakkirang dongna nanga,” ine Sukrobar salo, BJP-ni dilgipa aro a·dokni Cabinet Minister AL Hek aganaha.
Dhar-ko kam watchina gita Congress dolni dabienggipani bidingo janapatengon, “Anga songbadrango seanirangko poraimanaha aro Congress dolni matnanganikoba nikaha. Anga an·tangba Congress baksa term-sade ong·aha indiba matnanganirangko dakengon, sakkirang dongna man·ode nambata,” ine Hek aganaha.
“Matnanganirang kakket ong·a ine mesokna man·na nanga, uni ja·mansa sorkari ja·kuko de·na man·gen. Indiba sakki gride maikai uko kam watbo ine aganna man·gen? Indakede kamko ka·ja,” ineba BJP-ni dilgipa aganaha.
Iani bidingo sandirokchina dabianio BJP-ba chakpaaniko on·engama ine sing·on, “Inquiry-ko dakanide sorkarini jakosa ong·aia indiba sakkirang baksa ian kakket ong·a ine mesokchengna man·na nanga,” ine Hek parakataha.
Koborko on·ani gitade, Congress dolni somoio Dhar, HNLC-na tangka paisarangko dakchake on·achim indiba 2018 bilsio National People’s Party (NPP)-o napangani ja·mande ua dakchakanirangko on·jaha ine HNLC matnangatahachim.