SHILLONG: Shillong Fire Brigade-o bag gale donangako nike Sonibar atamo dikdiksanade so·so-jengjeng ong·angaha. Iana Law enforcement agency ta·raken ja·ku de·angaha.
Atamni 4 bajimango, rama re·ruragipa manderang bag-ko nike ta·raken police-na kobor on·ataha.
Kobor man·a jolan authorities, ua biapko champengataha aro ta·raken bomb disposal squad-ko okamate bag-ni ning·o maia donga dongjako am·sandiaha. Indiba sandiaon bag-o ba·ra-cholarangkosan man·aha aro darangnaba maming kenchakani dongja ine jinmana parakataha.
East Khasi Hills-ni Superintendent of Police, Vivek Syiem, ia obostani gimin parakataon, ramram manderangni bag-ko nike police-na kobor on·anina de·mittelaha aro mikkangchiba manderangko simsake dongchina aro iandakgipa obostarangko nikgenchimode ta·raken gisik seng·e ja·ku de·china mol·molataha. Minggipin an·tangtangni bosturangko indake galjachina aganaha, ian manderangni gisiko kenaniko nakatata, maina police dolrangni bomb squad-ko okamna nangaia ine aganaha.
Unbaksana jinma manderangko banoba biaprango gale dongipa bosturang jekai- bag, tiffin, box ba briefcase ba uandakgiparangko nika ong·ode kobor on·china ge·eteaha.
“Ta·rake kobor on·anichi police, somoi gita ja·ku de·na man·gen. Na·simang emergency number 112-ona call ka·atna man·gen.”
