Pakistan-ni dam 15 terrorist camp-rangko India nisigala: Sattelite
NEW DELHI: India a·songo bobil dake chakataniko warachakna bilakgipa ja·kurangko de·ani bidingo Sombar attamo, India a·songni Prime Minister Narendra Modi janapatenba, ian dinggrikani chasong ong·ja gitan bobil dake chakatani chasongba ong·ja ine bobil dolrangna mikrakataniko on·angaha.
Sombar attamo, a·songni manderangna video gita aganprakatengon, “Bobil dake chakatani aro agangrikani, bobil dake chakatani aro bading chiwalgrikani, chi aro an·chide apsan jokna man·ja. Pakistan a·song baksa agangrikode bobil dake chakatani giminsa agangrikaigen,” ine PM Modi, Pakisan-na bilakbegipa mikrakataniko on·angaha.
Sombar salo manianggipa Buddha Purnima-ni gimin janapatengon, ia salara tom·tomaniko mesokani sal ong·a indiba tom·tomaniko ra·baanio India, bilko jakkalna man·aigen ine PM Modi parakataha.
India-ni sipai dolrangko mittelpilangengon, ia sorkarini mongsonggipa miksonganian ‘A·songko skang donanisa’ ong·ani gimin bilakgipa ja·kurangko de·na man·aigen ine PM Modi aganaha.
Pakistan-ko uamangni bobil dake chakatani kolrangchin nisigalgen ine mikrakataniko on·angengon, “Pakistan-o bobil dolrangni mongsonggipa a·tiprangko chinga nisigalaha aro uamang, bobil dolrangko warachakanio ching baksa bakrimani pal chingko chadrapskaahani gimin uamangni warachakgipa kolrangkoba nisie galaha,” ine PM Modi aganaha.
Iana skang salni bako a·songni Prime Minister Narendra Modi, Union Defence Minister Rajnath Singh, External Affairs Minister S Jaishankar aro NSA Ajit Doval baksana sorkarini dingtang dingtang official-rang baksa tom·aniko ong·atangenba Operation Sindoor-ni bidingo chanchirimangaha.
Tom·aniko New Delhi-o donggipa Prime Minister-ni noko ong·atangaha aro ia tom·anio, Defence Staff-ni Chief General Anil Chauhan, General Upendra Dwivedi, Admiral Dinesh K. Tripathi aro Air Chief Marshal Amar Preet Singh-ba bak ra·angaha.
Indake ong·engon, adita salrangna skang, Operation Sindoor-ko dakanichi India-ni Pakistan-o donggipa aro Pakistan-occupied Kashmir (PoK)-o donggipa bobil dolrangni a·tiprangko chadrapanio, bobil dake chakatgipa dolrangni dam 15 a·tiprangko nisie galna man·aha ine Sattelite-o man·rikgipa sakkirangko Open Source Intelligence expert Damien Symon mesoke on·angaha.
Ia nisanrangoni mongsonggiparangara, Bahawalpur-o Jaish-e-Muhammad (JeM)-ni mongsonggipa a·tip ‘Markaz Subhan Allah’, Lashkar-e-Taiba (LeT)-ni headquarter dakenggipa Muridke-ni ‘Markaz Taiba’, Hizbul Mujahideen (HM)-ni bilake ma·chakgipa Sialkot-ni ‘Mehmoona Joya’ aro gipinrang ong·a.
Una agreba, ‘Sawahi Nallah Camp’, ‘Markaz Syedna Bilal’, ‘Markaz Abbas Kotli’, aro ‘Markaz Ahle Hadith’ baksana bobil dolrangni gipin a·tiprangkoba India-ni sipairang nisigalna man·aha.
A·song damgnini simarango Pakistan-ni chadrapsimani gimin ia a·tiprangko India chadrapskae, nisie galaha.
Re·anggipa April 22 tariko Kashmir a·dokni Pahalgam-o bobil dake chakatgipa manderangni skatang goanio sak 26 dosgri manderang so·otako man·ahani gimin Pakistan aro PoK-o ma·chakenggipa bobil dolni a·tiprangko India-ni sipairang, Operation Sindoor-ni bimingo nisie galskaaha.