SHILLONG: Ia 2025 bilsini Common University Entrance Test-Under Graduate (CUET-UG)-ko sena gita a·dokni mitam chatro chatrirangna chel·gipa a·dokrangosa centre-rangko tikatani ja·man a·dok sorkari, National Testing Agency (NTA)-na sedoatenba da·o a·dokon CUET centre-rangko man·dapaha aro uandaken gipin a·dokrango CUET-ko sena nangenggipa chatro chatrirangnaba da·o gital dake centre-rangko sualpiltaiaha ine Education department-ni Commissioner & Secretary Vijay Kumar Mantri parakataha.
Mantri-ni u·iatani gitade, gipin a·dokrango CUET-ko sena gita centre-rangko tikata man·gipa chatro chatrirangnaba da·o a·doktangon centre-rangko sualpiltaiaha.
Porikka sechakani centre-rangko sualanio a·dok sorkaride maming bak dongpaja ine janapatengon, examination centre-rangkode NTA-sa, automated software system-ko jakkalenba suale on·enga ine Education department-ni Commissioner & Secretary parakataha.
Ia automated software system-ara, candidate sakprakni dorgastorango gapatani krisa centre-rangko suale on·a ineba Mantri talataniko on·angaha.
Ia 2025 bilsini CUET-UG-na Meghalaya a·dok gimikni sak 12,685 chatro chatrirang register ka·aha indiba Meghalaya a·doko centre-rang chu·ongjani a·selo sak 7742 candidate-rangnasan a·doko centre-rangko tikate on·na man·aiahachim. Sak 4943 candidate-rangnade Meghalaya a·dokni a·palrangosa centre-rangko tikate on·na nangaha aro ianoni sak 4654-de Assam-o indiba sak 289 candidate-rangnasa Meghalaya aro Assam a·dokni a·palrango centre-rangko tikatskaahachim.
Ia sak 289 candidate-rangoni sak 93-nade salgro salaramni a·palrango centre-rangko tikate on·aha aro saksanade uni dorgastoo gapatani kri Port Blair-o centre-ko on·aha ine Education department-ni Commissioner & Secretary talataniko on·angaha.
Centre-rang chu·ongjani gimin ja·manchake u·iatani bidingo janapatskaengon, ia 2025 bilsini CUET-UG-na a·doko examination centre-rang chu·ongjani gimin NTA, a·dok sorkarina seng·gnang u·iatsamsojaha aro adita sak chatro chatrirangna Meghalaya-ni a·palrango centre-rangko tikatani ja·mansa ma·sina man·aha ine Mantri parakataha.
Iani bidingo a·dok sorkarina u·iatani ja·man, a·dokni dingtang dingtang biaprango donggipa dam 800-na baten computer centre-rangko ra·dapaha aro iani bidingo NTA-na u·iatenba da·o chatro chatrirangna a·doktangon centre-rangko suale on·na man·aha ine Mantri parakataha.