BAGHMARA: 2025 Batch-ni MCS Trainee Officer-rang Budbar salo, South Garo Hills a·jaona re·angenba, sorkarini kamrangko ma·sie ra·na gita South Garo Hills District Administration-ni administrative official-rang baksa Baghmara-ni New Circuit House Conference Hall-o tom·aniko ong·atangaha.
Ia MCS Trainee officer-rangna, South Garo Hills a·jao salgittamni training aro exposure program-ko ong·atenga aro ia program-ni ning·o MCS trainee officer-rangna district aro block-ni gadango ka·enggipa kamrangni giminba skie on·enga.
Ia MCS Trainee officer-rang South Garo Hills a·jao, NRLM/NUIM-ni ning·o donggipa dingtang dingtang self help group (SHG)-ni membor-rang baksa aro DCIC, Agriculture aro Horticulture department-ni beneficiary ba namgniko man·enggipa manderang baksaba tom·e agan-chanchirimanirangko dakangaha.
Unbaksana dingtang dingtang department-rang, jekai Police, DRDA, DCIC, Tourism aro uandakgipa department-rangni officer-rang baksaba ia MCS trainee officer-rang, tom·e chanchirimanirangko dakangaha.
Ia trainee officer-rang, Deputy Commissioner-ni office, Police Station-rang aro Block office-rangonaba re·ange, Planning, Election, Revenue, Supply aro uandakgipa branch-rangni kamrangko nie ra·enga.
Una agreba ia MCS Trainee officer-rang, MGNREGA-ni project site, Soil & Water Conservation Department-ni Chitmang Chaiwat, Siju Cave aro uandakgipa biaprangkoba niangjolaha.
