SHILLONG: Manipur a·dokni skotong Imphal songjinmao donggipa Regional Institute of Medical Sciences (RIMS)-o Nursing-ko poraienggipa chatri saksani ong·na kragija bewalo sianina independent inquiry ba jakgitele sandirokaniko dakatchina gita didie, Meghalaya Pradesh Youth Congress (MPYC), Manipur a·dokni Governor-na sedoataha.
Ia chatriara, Garo Hills-oni Abiel Salchiana Ch Marak ong·achim aro ua RIMS-o B.Sc Nursing-ko 4th Semester-o poraiengachim. Indake ong·genchimoba, re·anggipa May 14 tarik Budbar pringo, uko hostel kuturi damsao sie dongakosa man·aha.
Iani bidingo, Manipur a·dokni Governor-na sedoatengon, Imphal songjinmani RIMS-o poraienggipa A·chik chatri saksani sianiara uni nokdangna kalimanikosan ra·baaiaha ong·ja indiba gipin biaprango donge poraienggipa Tribal chatro chatrirangni naljokani bidingo jajrengchakna nanganikoba ra·baaha ine MPYC parakataha.
Ia chatri, uni poraichakenggipa biap aro hostel-o dokkol ka·e roaniko, onchepaniko aro institute-ni gita simsakgijaniko man·e iandakgipa obostako chagrongna nangahakon ine janapatengon, ia a·selni bidingo kakketko ma·sina man·na gita jakgitele sandirokaniko dakatchina MPYC, Manipur Governor-ko mol·molataha.
Manipur a·doko poraienggipa dingtang dingtang biaprangoni chatro chatrirangna simsak nirokani aro chel·chakanirangko on·china gitaba MPYC, Manipur Governor-ko didiataha.
Apsan daken ia chatrini siani bidingo Garo Students Union (GSU)-ba judicial inquiry-ko dakchina dabiangaha.
“Ia chatri an·tangko so·ote siakon ine chanchichipe report-ko on·ahaoba, obostarangko nigenchimode ian uni kosako sinjetani aro institute-ko chalaienggiparangni simsakgijaniko mesokani ong·enga, uni gimin ia chatrini sianiko maming mikkang niteani gri, jakgitele sandirokgenchimode talbate a·selko ma·sina man·gen,” ine GSU-ni president Tengsak G Momin parakataha.
Indake ong·engon, ia chatrini ong·na kragija bewalo siahani gimin Meghalaya a·doko dingtang dingtang dolrangni nangrime bikotgipa Confederation of Meghalaya Social Organisations (CoMSO)-ba sandirokatchina didie, Manipur a·dokni Governor-na sedoataha.
Ia a·selna suk ong·gijaniko parakatengon, “Ia chatrini sianiko an·tang so·ote sia ine skang report-ko on·ahaoba, ia chatrini kosako dokkol ka·ani aro ong·gija dakanirangko matnangtokengani gimin kakketko ma·sina gitade judicial inquiry-ko dakna nangenga,” ine CoMSO-ni general secretary parakataha.
Ia a·selni bidingo jakgitelgipa judicial inquiry-ko ra·gatchina Manipur a·dokni Governor-ko didiatengon, iani bidingo sakki donggipa chatro chatrirangna naljokaniko on·china, inquiry matchotkujaskal ia kamo chanchichipna kragipa RIMS-ni official-rangko ba staff-ko kam dontongatchengchina aro Manipur-o poraienggipa Tribal chatro chatrirangna, mongsongbate Meghalaya-ni chatro chatrirangna chel·chakanirangko on·china CoMSO, Manipur a·dokni Governor-ko didiataha.