SHILLONG: Manipur a·dokni Imphal songjinmao donggipa Regional Institute of Medical Sciences (RIMS)-o Abiel Salchiana Ch Marak minggipa nursing chatri saksani sianiko sandirokchina dabianirang donga ong·ode, siani a·selko ma·sie ra·na gita sandirokna nanga ine Meghalaya Assembly-ni Speaker aro North Tura-ni MLA Thomas A Sangma aganaha.
Sianggipa chatrini nokdangara uni constituency-onin ong·ani gimin ia a·selni bidingo mamingko aganpana skangba ua ia nokdangni manderang baksa agangrikchengna nangnikenga ineba ua aganaha.
“Ian ong·nanggija a·sel ong·aha aro ia chatrini siani bidingo sandirokchina dabianirang donga ong·ode sandiroknan nanga indiba anga an·tangde da·o dipet mamingkoba aganpana man·jawa,” ine Sangma aganaha.
Iani bidingo talbate aganna gita jechakengon, “Anga da·omangmangsa Delhi-oni sokbapilaha aro sianggipa chatrini nokdangko anga grongechenggen,” ine North Tura MLA aganaha.
Ia a·selni bidingo sandirokchina dabianirang batrorobaengani gimin janapatskaengon, “Ia a·selni bidingo judicial inquiry-ko dakchina dabigiparang donga indiba sianggipa chatrini nokdangko grongchenggijade anga mamingkoba aganna man·jawa,” ine Sangma aganaha.
RIMS-o nursing-ko poraienggipa chatrini ong·na kragija bewalo siahani gimin dingtang dingtang dolrang, jekai Confederation of Meghalaya Social Organisations (COMSO), Garo Students Union aro Meghalaya Pradesh Youth Congress (MPYC)-ba jakgitele sandirokatchina dabitokahachim.