SHILLONG: Budbar salo, a·dokni Chief Minister Conrad K Sangma, Meghalaya Healthcare Advancement Policy (MHAP)-ni ning·o gong krorsani skanggipa instalment-ko Jowai-o donggipa Dr Norman Tunnel Hospital-na pakwate on·angaha.
Ia MHAP-ni ning·o dingtang dingtang private hospital-rangna a·dok sorkari, krorgni ka·e on·enga aro bangki krorsakode, skanggipa instalment-na utilization certificate (UC)-ko on·ani ja·man on·angskagen.
Da·o dipet ia scheme-ni ning·o gong kror 10 tangkarangko, lapna dakgijagipa dambonga hospital-rangna Chief Minister-ni jakchi on·angaha.
Ia hospital-na tangka paisarangko pakwate on·anganio a·dokni Chief Minister, jinmana aganprakengon, a·dok sorkarini mission hospital-rang baksa bakrime kamrangko ka·engani gimin aganangaha.
“Ia dakchake on·aniara changsasan ong·aijawa indiba bakrime kam ka·aniko a·bachengatanisa ong·enga. Ia scheme-ni ning·o hospital-rang an·tangan nangani kri tangka paisarangko jakkalna man·gen,” ine Sangma aganaha.
Sorkari, mission institute-rang aro dingtang dingtang dolrangni gisepo bakrime kam ka·aniko nambatatna gita health care conference-ko ong·atna gitaba ia tom·anio Chief Minister parakataha.
Meghalaya a·doko ma·giparangni an·pakanio sianiko komiatna kam ka·aniko janapangengon, dingtang dingtang cholrangko ra·gate kam ka·anichi da·o ma·giparangni sianiko 45%-na baten komiatna man·aha ine Chief Minister parakataha.
Ia tom·aniko Rev S Lamare dilangaha aro ia hospital-na tangka paisarangchi dakchakaniko on·engani gimin sorkariko mittelpilangaha.
Ia tom·anio, Dr Norman Tunnel Hospital-ni Medical Superintendent Dr D Nongpluh-ba jinmana aganprakengkon, dingtang dingtang sabisirangko man·e sianirang batroroengani gimin renal dialysis unit-ko nangchongmotenga ine sorkarina u·iataha.
