SHILLONG: Dongimin niamrango aro a·dok sorkari baksana Khasi Hills Autonomous District Council (KHADC)-ni skang songgigrikanio pangchakesa National Highway (NH-6)-ni Umdihar-o donggipa KHADC-ni toll gate-ko chipataha ine Ri Bhoi a·jani Deputy Commissioner Abhilash Baranwal talataniko on·angaha.
Ia toll gate-ko chipatani bidingo matnanganirangko man·tokengani gimin ua ia talataniko on·angaha.
Ia toll gate-ko chipatanichi KHADC-na mande ra·gijaniko mesokaha ine matnanganiko jegalatengon, Ri Bhoi District Administration, KHADC-na dal·en mande ra·ani donga ine Baranwal parakataha.
Iani bidingo kobor ra·timgipa manderang baksa agangrikengon, “Ian Six Schedule a·doksa ong·ani gimin KHADC-ko mande ra·gijani katta dongja,” ine Ri Bhoi DC aganaha.
Ia toll gate-ko May 15 tariko kuliani ja·man, dongimin niamrangko pe·e garirangoniko kajina gilenga ine koborko man·soahani gimin Ri Bhoi a·jani District Administration, ia toll gate-ko salgipinon chipe donatpilahachim.
Indake ong·engon, ia toll gate-ko chipatanina District Administration-ni kosako KHADC official-rang jegalatskaenba, ia toll gate-ko work order, Dorbar Shnong-ni no-objection certificate (NOC) aro pilak niamrangko matchotesa kuliaha ine parakatskaahachim.
Indake ong·genchimoba, KHADC-ni work order-o janapgimin niamni bidingo Ri Bhoi a·jani Deputy Commissioner, jinmana mesoke on·angskaaha.
“Work order-ni dokgipa point-ko nigenchimode, national highway-rango iandakgipa gate-rangko kulina man·jawa ine talen janapani gnang. Ia niamo pangchakesa District Administration, ia toll gate-ko chipna nangaha,” ine Baranwal parakataha.
2021 bilsio KHADC baksa chanchirime Meghalaya sorkarini on·gipa niamni bidingo janapatskaengon, ia niamoba, PWD aro National Highway ramarango iandakgipa toll gate ba check gate-rangko kulijachina raken beng·ani donga ine Deputy Commissioner parakataha.
“Batanggimin jagnini gisepo, KHADC aro Syiem Hima Mylliem, damchet ba dam 10-mangni gita check gate-rangko kuliaha indiba chinga ia check gate-rangkode chipatjaha,” ine Baranwal talataniko on·angenba, Umdihar-o donggipa toll gate-kode niam pe·ani giminsa district administration chipna nangao ga·akaha ine parakataha.