TURA: South Garo Hills a·jao bijoliko name man·rongjaengani a·sel manderang neng·nikanirangko chagrongna nangtokenga ine Garo Students Union (GSU) Southern Zone parakatenba, bijoliko nambate on·na man·na gita Baghmara-ni MePDCL Sub-Divisional Office full fledged Divisional office-ona ra·doatchina sorkario dabiangaha.
Iani bidingo GSU SZ, a·dokni Chief Minister Conrad K Sangma-na sedoataha aro ia apsan chittikon a·dokni Education Minister aro Siju-Rongara MLA Rakkam A Sangma, Shillong-o donggipa MePDCL-ni Chief Executive Engineer, South Garo Hills-ni Deputy Commissioner aro gipin officer-rangnaba watataha.
Chief Minister-na sedoatgipa chittio GSU-ni parakatani gitade, Baghmara-ni MePDCL Sub-Divisional office-ko 1992 bilsio South Garo Hills a·jako songani ja·man MeSEB-ni somoiosa kulichengahachim indiba da·alonan ia office-ko maming namdapatani gri, apsan gadangon chalaikuengani a·selsa South Garo Hills a·jao bijoliko name on·na man·kujaengachim.
“Batanggimin bilsi 30-ni gisepo, bang·a songrangkon REC-ni ning·o bijolirangchi teng·atahaoba ia sub-station-o kam ka·giparangko ba kolrangko maming namdapanirang dongkuja aro ia sub-division-o SDO saksa, lineman sakchet, emergency kamna sak 3 aro field-ni kamna sakbongasan dongaia. Emergency kamko ka·gipa dolba da·onan garirang dongjani a·selan bijoli nosto ong·ani somoirango dakchakanirangko on·na man·jaenga,” ine GSU SZ-ni dilgiparang parakataha.
Songadam nokadamrangona bijoliko salanio, ramram krongrangsakosa songengani a·selan mikka balwa rakani somoirango altuaen bijolirang nosto ong·atako man·enga ine janapatengon, bijoli nosto ong·ani somoirangoba lineman-rang somoi gita sokangna man·rongjani gimin iandakgipa songrango baditaba salrangna bijoli gri ong·e dongna nangronga ine GSU SZ parakataha.
Indake ong·engon, Mindikgre, Erenggre, Emangre, Karukol, Panda aro uandakgipa songrango ta·raken bijolirangko tarie on·na man·na gita komibeoba lineman sakprakko emergency duty-na donatchina gita GSU-SZ, a·dokni Chief Minister-ko mol·molataha.