Garo Hills-o pass ka·ani 76.71% gapa
TURA: Ia 2025 bilsini Secondary School Leaving Certificate (SSLC) porikkao chu·sokpana man·gijagipa chatro chatrirangna ong·atanggipa Supplementary porikkani result-rangko mijal Sombar salo parakataha aro ia Supplementary porikkaoba, SSLC porikkao gitan Garo Hills-ni chatro chatrirang bewalan chu·sokgiparang ong·na man·aha.
Ia Supplementary porikkako Garo Hills gimikoni sak 4836 chatro chatrirang seaha aro ianoni sak 3710 chatro chatrirang pass ka·e, pass ka·ani percentage 76.71 percent gapangaha.
SSLC porikkao gitan ia Supplementary porikkaoba South Garo Hills a·jao pass ka·ani percentage 85.58 percent ong·e, Garo Hills gimiko nambatgipa ong·taiaha.
South Garo Hills a·jao ia Supplementary porikkako gimik sak 333 chatro chatrirang seaha aro ianoni sak 285 chatro chatrirang pass ka·aha. North Garo Hills a·jao ia porikkako sak 924 chatro chatrirang seskaaha aro ianoni sak 747 chatro chatrirang pass ong·e, pass ka·ani percentage 80.84 ong·skaaha. South West Garo Hills a·jao gimik sak 996 chatro chatrirang ia porikkao seaha, aro ianoni sak 760 chatro chatrirang pass ka·e, pass ka·ani percentage 76.31 gapaha. West Garo Hills a·jao gimik sak 2037 chatro chatrirang, Supplementary-ko seaha aro ianoni sak 1536 chatro chatrirang pass ka·e, pass ka·ani percentage 75.41 percent gapskaaha. East Garo Hills a·jao sak 546 chatro chatrirang, ia porikkako seaha aro ianoni sak 382 chatro chatrirang chu·sokgipa ong·e, pass ka·ani percentage 69.96 percent gapaha.
 |
ReplyForward
|