TURA: Tura Medical College-ko Public-Private Partnership (PPP) mode-o chalaina sorkarini tik ka·aniko Garo Hills-ni dingtang dingtang NGO-rang, chong·motan Garo Students’ Union (GSU), Federation of Khasi-Jaintia & Garo People (FKJGP), Association for Democracy and Empowerment (ADE), A·chik Youth Welfare Organization (AYWO), aro Federation for A·chik Freedom (FAF) dolrang jegalatenba, ia medical college-ko chalaiani bidingo dingtang dingtang dolrang aro Garo Hills-o songdongenggipa manderang baksa chanchirimchengenba manderangna namgni ong·na gita sorkarichin chalaichina didiataha.
“Tura Medical College-ara manderangni namgnina sorkarini tangka paisarangchin rikgipa mongsonggipa college ong·a aro ia medical college-ko kuliani mongsonggipa miksonganiara medical-ko poraigiparangna aro manderangna komia damrango sanna bananirangko on·na miksonge kulianian ong·a. Ia medical college-ko PPP mode-o private company-chi chalaina on·aniara ia miksonganiko pe·ani ong·enga,” ine NGO-rang parakataha.
Tura Medical College-ko PPP mode-o chalaianio namgijanirangko janapatskaengon, ia niamo private company-rangna sorkarini a·ako bilsi 33-na on·chengani ja·man bilsi 33-na ra·dodaptaina man·ani gimin ia medical college-ko bilsi 66-na private company-chi chalaina on·ani gita ong·engaha ine NGO-rang parakatenba, ia medical college-ko indita ru·utbea bilsirangna on·ahaode, ia medical college-ko chalaienggipa company-ni kamrang namjagenchimoba bilsi 66 bon·kujaskalde ra·pilani katta dongjawaha ine talataniko on·angaha.
“Expression of Interest (EOI)-ni niamo ia medical college aro hospital-ko private company-ni changa sapani gita chalaina on·engani gimin ian medical-ni lekka poraniko on·anio aro sanna bananirangko on·anioba company-ni skani gita korosrangko ra·na man·aigen aro ian jolni manderangna gimaani ong·gen,” ine NGO-rang parakataha.
Medical college-ni fee-rangkoba college-ko chalaienggipa company-ni skani gitasa tarina man·a ine janapatengon, college-ni seat-rangkoba 50 percent-onasan management category-ni ning·o kangna man·aiani gimin ian public aro tribal quota-rangko pe·ani ong·gen ine NGO-rang parakataha.
“Uni gimin ia medical college-ko pilakni namgnina sorkarian jako ra·e chalaina nangenga,” ine NGO-rang parakatenba, ia medical college-ko PPP mode-o chalaina dakkiani kamrangko dontongatchengchina sorkariko didiataha.
Ia mol·molaniko knachakjagenchimode jingjengatanirangko dakna draatako man·gen ineba NGO-rang mikrakataniko on·angaha.
 |
ReplyForward
|