TURA: East Garo Hills a·jani Nengkhra jolrango donggipa chatro chatrirangni namgnina Nengkhra RMSA-ko higher secondary-ni gadangona ra·doatchina aro ia skulrango admission on·anio dontongataniko nipiltaichina gita Garo Students Union (GSU) Nengkhra unit, a·dokni Chief Minister Conrad K Sangma-na sedoataha.
GSU Nengkhra unit-ni parakatani gitade, ia Nengkhra RMSA-ara, Nengkhra, Chimagre, Dobu, Nongalbibra, Nengja, Garregittim aro uandakgipa samba jolrango donggipa manderangna mongsonggipa skul gita ong·enga aro ia skulo bilsiantian SSLC porikkaoba chatro chatrirangni pass ka·gopaniko nikna man·rongenga.
“Jolo songdongenggipa manderangni dabiani aro East Garo Hills DSEO-ni recommend ka·anio pangchake ia skulko chalaienggipa manderangba, ia skulo higher secondary gadangona ra·dona pilak tarisamsona nanganirangko matchotahachim aro Nengkhra jolrangoni sak 60-na baten chatro chatrirangba, form-rangko submit ka·tokahachim. Indake ong·genchimoba, ia skulo admission on·aniko dontongchina sorkarini ge·etaniko on·ani ja·man bang·a chatro chatrirangan da·o jajae dongna gita nangtokengaha,” ine GSU Nengkhra unit-ni dilgiparang parakataha.
Ia skulo admission on·aniko dontongchina sorkarini ge·etaniko on·anina suk ong·gijaniko parakatengon, gipin skul aro college-rango biap dongana batpilen chalaina gita nangenga aro da·o SSLC Supplementary-ni result-koba parakahani gimin biaprangko nangdapengaha ine GSU Nengkhra unit-ni dilgiparang parakataha.
Ia jolrango donge poraienggipa bang·a chatro chatrirangan cholgrigipa nokdangrangonisa ong·ani gimin ia RMSA-ko higher secondary-ni gadangona ra·doatjagenchim ong·ode chatro chatrirang bang·batan gipin biaprango poraipana chol ong·jae, poraiako dontongna nangtokaignok ineba GSU Nengkhra unit parakataha.
“Uni gimin Nengkhra RMSA-ko higher secondary-ni gadangona ra·doatchina mol·molaniko ta·raken ra·chakchina aro ia skulo chatro chatrirangna class XI-o admission-ko ra·e poraipana cholko on·china chinga mol·molenga,” ine GSU Nengkhra unit-ni dilgiparang, a·dokni Chief Minister-na sedoatgipa chittio janapataha.