WILLIAMNAGAR: India a·song gimikon Prime Minister Narendra Modi aro Union Agriculture Minister Shivraj Singh Chauhan-ni dilanichi a·bachengatgipa Viksit Krishi Sankalp Abhiyan-ko Bristibar salo East Garo Hills a·jaoba Krishi Vigyan Kendra (KVK) a·bachengate on·angaha.
Ia campaign, jekon Indian Council of Agricultural Research (ICAR)-ni gita dakchake on·engachim, iako re·baenggipa June 12 tarikona kingking a·song gimikon ong·ate, pilak dam 700 a·jarango game ge·e cha·enggipa kror 1.5-na baten bak ong·atanggen.
East Garo Hills a·jao ia campaign-ko a·bachengatanio, Meghalaya a·dokni Soil & Water Conservation Minister Marcuise N Marak, mongsonggipa sokgipa ong·e bak ra·angaha aro unbaksana Central Agricultural University ning·o donggipa Tura College of Community Science-ni Dean in-charge Dr Namita Singh aro gipin official-rangba dongpae bak ra·angtokaha.
Ia tom·anio Marcuise Marak, jinmana aganprakangengon, obostani kri gama ge·ani bidingo skie on·na gita ia campaign-ara namen gamchatgipa ong·a ine parakataha.
Mikkarang nangana bate waani somoio aro mikkarang wajani somoirango maikai gama ge·anirangko dakna nanga, uarangni bidingo songni nokni manderangna, mongsongbate game ge·e cha·giparangna agan-skie on·anirangko dakna nangengani giminba Marak aganangaha.
KVK East Garo Hills-ni gita dingtangmancha dolgittam scientific dolrangko, dingtang dingtang department-ni official-rang baksa song damskuona watatenga aro ia songrangara, Sampalgre, Nengkra, Nengmandalgre, Dobetkokgre, Ampangdamgre, Dawa Nengkatok, Bonegre A, Bonegre B, aro Charan Bonegre songrang ong·a.
Ia VKSA campaign-ko ong·atani miksonganiara, gama ge·anio jakkalgipa gital kolrangko aro gital bitchilni rokomrangko ma·siate on·na, Soil Health Card-rangko jakkalani gamchataniko u·iatna, sorkarini dingtang dingtang scheme aro policy-rangko u·iatna, game ge·e cha·giparangni u·i-ma·sianirangko knatime ra·na aro uandakgipa kamrangan ong·a.