TURA: India a·song gimikon Prime Minister Narendra Modi aro Union Agriculture Minister Shivraj Singh Chauhan-ni dilanichi a·bachengatgipa Viksit Krishi Sankalp Abhiyan (VKSA)-ko Sukrobar salo West Garo Hills a·jaoba Krishi Vigyan Kendra (KVK) a·bachengataha.
Ia VKSA campaign-ko a·bachengatanio mikkarang wabegenchimoba West Garo Hills KVK-oni dolgittam Kristri Rath dolrang, gama ge·ani bidingo agan-talate on·na gita dam 12 songrangona re·chakatangaha.
Ia dolgittamko Dr Joyoshree Mahanta (SMS Plant Pathology), Dr Tarun K Das (SMS Agriculture Extension) aro Dr N Arun K Singh (SMS Soil & Water Conservation) dilangaha aro uamang baksana ICAR-ni Dr H Talang (Scientist, Fruit Science) aro Dr Christy Sangma (Scientist Soil Science) aro CAU Tura CCS-oni Dr Ranima Saikai (Associate Professor)-ba re·angaha.
Ia dolrango, ATMA aro dingtang dingtang department-ni official-rangba re·angaha aro ia dolrangni re·angenggipa biaprangara, Chandegre, Chandapara, Dilnigre, Sasatgre, Nengja Bolchugre, Jijikapara, Nengja Bolchugre, Nenjapara, Joshipara, Asimgre, Barrengre aro Indik Nokat ong·enga.
Ia program-rangko ong·atanio mikkarang wagenchimoba songni nokni bang·a manderangan re·bae bak ra·angtokaha aro bak ra·anggiparangoni sak 309-de game ge·e cha·giparang aro sak 566-de me·chikrang ong·a.
Game ge·e cha·giparangna agan-talatanirangko on·angengon, maikai ia gital chasongo gital gama ge·ani kolrangchi nambate gama ge·anirangko dakna man·gen, uarangni bidingo official-rang, game ge·e cha·giparangna agan-talatanirangko on·angaha.
Ia VKSA campaign-ko ong·atani miksonganiara, gama ge·anio jakkalgipa gital kolrangko aro gital bitchilni rokomrangko ma·siate on·na, Soil Health Card-rangko jakkalani gamchataniko u·iatna, sorkarini dingtang dingtang scheme aro policy-rangko u·iatna, game ge·e cha·giparangni u·i-ma·sianirangko knatime ra·na aro uandakgipa kamrangan ong·a.
