SHILLONG: Party-ni general secretary Dr Jemino Mawthoh-ni party-oni ong·katani gimin United Democratic Party (UDP) bilgrignok indake ong·ja, uni ong·katanichi party-na maming nangchakeani dongjawa ine UDP president Metbah Lyngdoh, kobor ra·timgiparangni sing·anio aganaha.
Mawthoh, uni kam watani chittio party-ko maming matnange agananirangko janapja, an·tangni neng·nikanirangkosan janapaha, unigimin uni party-oni ong·katanganichide UDP-na maming nangchakeani dongjawa ine Lyngdoh aganaha.
Mawthoh, party-o bimchipgipa aro ru·uta bilsirangna UDP-o bakrimgipa ong·achim, maina anga an·tangba un baksa ru·uta somoirangna apsan kamrangko ka·rimaha, ua party-oni ong·katoba chinga party-ni gita re·mikkangna nangaigen, UDP president aganaha.
Party-ni gitcham general secretary Mawthoh-ni ong·katanian UDP-o meligrikgijani chin ong·a ine agananirangko jegalengon, manderangni aganaiana uko ra·chakaiani ong·ja. Indakgipa maming kattarang da·o dipet party-o dongja ine ua aganaha.
UDP-ni gitcham general secretary Jemino Mawthoh, an·tangni adita neng·nikanirangko janapenba United Democratic Party (UDP)-oni ong·katan baksa Meghalaya Sorkario una tikatgipa Honorary Adviser-oniba uni ong·kataniko parakatahachim aro uni kam watani chittikoba UDP president, Metbah Lyngdoh-na on·ahachim. Dr Mawthoh, batanggimin 2014 bilsionin UDP baksa bakrime kamrangko ka·baaha.
