SHILLONG: United Democratic Party (UDP)-ara maming miksongani grigipa aro cholrangko nisenggipa party-san ong·aia ine Voice of the People’s Party (VPP) matnangatenba, ia party manderangni ka·dongchakna man·aniko ta·raken gimaatengahani gimin 2028 bilsiode gimana siengaha ine parakataha.
“UDP-o manderang ka·dongchakna man·jaengahani gimin 2028 bilsiode ia party bilgrigipa dolsan ong·aignok,” ine VPP-na ku·wattimgipa Batskhem Myrboh a·kangataha.
UDP-ara doltangni gisepon meligrikna man·gijagipa aro maming miksonganirang donggijagipa party-san ong·aia ineba ua aganaha.
“Uamang maina chadengenga ba maina kamko ka·enga ukon ma·sigijagiparangsa ong·a. Ia party, cholrangko nigipa party-san ong·aia,” ine Myrboh aganaha.
Re·anggipa Sonibar salosan UDP-ni gitchambatsranggipa dilgiparangoni saksa Jemino Mawthoh, kamtangko wate party-oni ong·katani ja·man UDP-ko VPP matnangataha.
Indake ong·engon, VPP-de sawa party-ko wate re·angenga ba sawa badia party-o napenga, uko dal·e ra·gijagipasa ong·a ineba Myrboh parakataha.
“Chingni bilakani ba bilgrianide, manderangni namgnina chingni ja·dil su·aniosa pangchakaia,” ine ua aganaha.
Jemino Mawthoh, VPP-ona re·bagenchimode uko party-ni dilgiparang rimchaksoaigenma ine sing·anina aganchakaniko on·angengon, “Skanggipa chinga obosta mingantikon che·em che·em nichengna nanggen indiba da·o dipet chinga iani bidingo party-ni gita chanchia dongkuja,” ine Myrboh parakataha.
VPP-de gipin party-ni dilgiparangko rime katanio bebera·gipa dol ong·ja ine janapatengon, ia party-de onbatgipa gadangonikon dilgiparangko tarinasa kamko ka·enga ine VPP-na ku·wattimgipa aganaha.
“Chinga da·o dilgiparangko tarina kamrangko ka·enga aro 2028 bilsiode na·simang mikkangchi a·dokko dilnagipa bang·a manderangkon nikna man·gnok,” ine ua aganaha.
KHADC election-ni gimin toe janapatengon, ia election-o sak 17 gital MDC-rangko seokaniara apsan dilgiparangko seoktaitaianiko jegalanian ong·aha in Myrboh aganaha.
