TURA: Tura Medical College-ko Public-Private Partnership (PPP) mode-o chalaina sorkarini tik ka·aniko Garo Hills-ni dingtang dingtang NGO-rang, chong·motan Tura Senior Citizens, Tura Mothers Union, Garo Students’ Union (GSU), Federation of Khasi-Jaintia & Garo People (FKJGP), Association for Democracy and Empowerment (ADE), A·chik Youth Welfare Organization (AYWO), Federation for A·chik Freedom (FAF), Garoland State Movement Committee (GSMC), A·chik Consciousness Holistically Integrated Krima (ACHIK) aro Post-Graduates Students Union, NEHU Tura Campus dolrang jegalatenba, jekai Shillong Medical College-ko sorkari jako ra·engachim, apsan daken Tura Medical College-ko maming mikkang niteani gri sorkarichin jako ra·e chalaichina a·dok sorkariko didiataha.
“Tura Medical College-ko, Garo Hills-o medical education aro sanna bananirangko komia damo ra·na man·na gitasa Doldegre aro Darechikgre A·king Nokmarangni on·gipa bigha 300 a·ao gong kror 189.10 koros ong·e rikahani gimin ia medical college-ko PPP mode-o private company-chi chalaiatanikode chinga raken jegalenga. Tura Medical College-ara 2014 bilsio ANVC dolrangni India aro a·dok sorkarirang baksa songgigrikanio ku·rachakgimin bak gita on·enggipa college-sa ong·a aro ia songgigrikanion, Garo Hills-o sanna banani aro lekka poraniko bakrime namdapatna ku·rachakgrikani donga. ANVC dolrang baksa songgigrikna skangan medical college aro hospital-ko sorkarini tangka paisarangchi chalaina aro Garo Hills-ni manderangna dangdike on·na man·na gita a·dok aro ma·mong sorkarirang ra·chakmanaha. Uni gimin da·o ia Tura Medical College-ko PPP mode-o private company-chi chalaianide ia songgigrikanikon pe·ani gita ong·engaha,” ine Garo Hills-ni NGO-rang parakataha.
Tura Medical College-o 50%-oni 55%-ona MBBS seat-rangko Meghalaya-ni chatro chatrirangna kanggen aro mikkangchi ia songgigrikanirang chu·sokanga ong·ode seat chamaniko 60 percent-onaba ra·doatani cholrang donga ine adita salrangna skang Chief Minister-ni news channel ge·sao agangipani gimin janapatengon, Directorate of Health Services (Medical Education & Research)-ni on·gipa Expression of Interest (EoI)-ode sorkarini quota-o 50 percent-onasan seat-rangko chamani dongaigen ine talen sea dongskaani gimin ian Chief Minister-ni agangipa kattarangoni namen dingtanggrikenga ine NGO-rang sing·doataha.
“Badia kattarang kakket ong·a? Gipin a·dokrangode an·tangtangni chatro chatrirangna 85 percent-ona kingking seat-rangko chamani dongengon maini gimin chinga 50-60 percent-kosan man·na nangenga?” ine NGO-rang sing·doataha.
Tura Civil Hospital-de sorkarion dongaigen indiba college-ni administration-kosa private company-chi chalaina nanggen ine Chief Minister-ni agangipa kattarangni gimin sing·doatskaengon, “Ia college-o poraienggipa chatro chatrirangara badia hospital-osa skie ra·skagen? Skie on·gipa hospital-ko sawa chalaigen?” ine NGO-rang sing·doatenba, National Medical Commission (NMC)-on medical college-rango skie on·gipa hospital dongchapna nangchongmota ine janapani donga ine Chief Minister-na gisik ra·atpilaniko on·angaha.
Tura Medical College-ko PPP mode-o chalaianio namgijanirangko janapatskaengon, ia niamo private company-rangna sorkarini a·ako bilsi 33-na on·chengani ja·man bilsi 33-na ra·dodaptaina man·ani gimin ia medical college-ko bilsi 66-na private company-chi chalaina on·ani gita ong·engaha ine NGO-rang parakatenba, ia medical college-ko indita ru·utbea bilsirangna on·ahaode, ia medical college-ko chalaienggipa company-ni kamrang namjagenchimoba bilsi 66 bon·kujaskalde ra·pilani katta dongjawaha ine talataniko on·angaha.
“Uni gimin jatni namgnina A·chikrangni on·gilgipa a·arangko jakkalsretjachina aro Tura Medical College-ko PPP mode-o chalaina tik ka·aniko del·galpilchina chinga sorkariko mol·molenga. Shillong Medical College-ko private company-ni chalaina on·jaenga ong·ode maini gimin Tura Medical College-ko private company-chi chalaina on·skaenga? Iako chinga maming dakeba ra·chakna man·chongmotjawa,” ine Garo Hills-ni NGO-rang parakataha.