RESUBELPARA: North Garo Hills a·jani Resubelpara samba jolo rikenggipa 100 bedded hospital-ko Sombar salo, Opposition dolni dilgipa aro a·dokni gitcham Chief Minister Mukul Sangma nieaha.
Chidaret songo rikenggipa ia 100 bedded hospital-ko 2019-2020 bilsirango a·bachengatahachim aro ia hospital-ko rikanio gong kror 50-mangni gita koros ka·engachim.
Da·o ia hospital-ko rikani kamrang 90 percent-ni gita matchotengaha aro ia hospital-ko re·baenggipa July jaonin kulina gita medical official-rang miksongenga.
Ia 100 bedded hospital-ko nina re·angani somoio kamrang matchotangengahani gimin Opposition dolni dilgipa Mukul Sangma, North Garo Hills a·jani health official-rangko aro hospital-ko rikenggipa contractor-rangko mittelpilangaha.
Ia 100 bedded hospital-ara North Garo Hills a·jani manderangnasan ong·aigija, gipin biaprango sondongenggipa manderangnaba bang·en namgni ong·gnok ineba Sangma aganaha.
Tura Medical College & Hospital gitan ia 100 bedded hospital-ara damgipin medical college-ko kulina cholrang donggen ineba Opposition dolni dilgipa aganaha.
