SHILLONG: Meghalaya Police-ni dingtang dingtang kamrango manderangko ra·na gita Central Recruitment Board (CRB) porikkarangko ra·engon, batanggimin somoirango police-ni kamna porikkarangko ong·atanio bang·bata chatro chatrirangan suk ong·nikgijaniko paraktokaha ine ia kamrangna gital dake porikkarangko ra·piltaichina, Opposition dolni dilgipa Mukul Sangma didiangaha.
“Iana skang ong·atanggipa porikkarangko den·galpilenba, ia kamrangna gital dake porikkarangko ra·piltaichina aro candidate-rang pilakkon ia porikkaona okamtaichina anga didienga,” ine Sangma, March-ni 6 tariko Meghalaya Police-ni kamrangna on·gipa advertisement-ni bidingo aganaha.
Ia kamrangna porikkarangko ra·ani bidingo ua an·tangan candidate-rang baksa agangrikani ja·man aro social media-rango matnange seanirangko nikani ja·man gital dake porikkako ra·piltaichina ua didienga ineba Sangma aganaha.
“Jensalo kamna advertisement-ko on·engon, Meghalaya Police Act 2010 aro dingtang dingtang niamrangko name ja·rikna nangchongmota,” ine Opposition dolni dilgipa aganaha.
‘Dongimin niamrangko ja·rikjagenchimode je gadangoba candidate-rangko jegalgen aro nanga gita ja·kurangko de·gen’ ine Clause 18(10)-o janapgimin niamni bidingo janapatengon, adita salrangna skang CRB-ni on·gipa u·iatanio ia niamko ja·rikjaha gita nika aro iani a·selsa manderangni jegalanirangko man·aha ine Sangma parakataha.
“Uni gimin kamna dorgasto galenggipa pilak chatro chatrirangni namgnina ia kamrangna gital dake porikkarangko ra·piltaichina anga didienga,” ine Sangma parakataha.