SHILLONG: Re·anggipa June-ni 4 tariko, Ri Bhoi a·jani Shangbangla jolo Assam-ni gari bolsa a·sel ong·e me·chik saksa sianggipa bidingo sianggipa me·chikni ma·drangrang, unbaksa gario dongpagipa gipin manderangko potchipahani gimin Ri Bhoi a·jani police-rang, ia a·selni bidingo, gario dongpagipa mande sakbriko sing·sandina okamataha.
Ia gari a·sel ong·anio Law-ko poraienggipa chatri Namrata Bora sina gita nangaha indiba unbaksa gario dongpagipa gipin manderangde adita saknaanirangkosan man·aiahani gimin sianggipa me·chikni nokdang, unbaksa gario dongpagipa manderangko potchipahachim.
Ri Bhoi a·jani Superintendent of Police (SP) Vivekanand Singh Rathore-ni kobor ra·timgiparangna u·iatani gitade, a·sel ong·ani somoio Assam MLA-ni depanre gariko salachim aro a·sel ong·ani ja·man sakgni manderangde, me·chikko a·sel ong·gipa biapon gale Guwahati-ona ia apsan garion katangaha ine nokdangni manderang matnangataha.
Saknaa man·gipa Namrata Bora-ko gario dongpagipa sakbri manderangoni sakgni manderangsa, bolgipin gario hospital-ona ra·angaha indiba hospital-ona sokangon uko siaha ine doctor-rang parakataha ine SP aganaha.
SP-ni aganani gitade, MLA-ni depante-ko sing·sandion, ua an·tangde gariko salja indiba sakgipinsa sala ine ua aganaha.
Ia mande sakbriko Ri Bhoi a·jani police-rang, Sonibar walo, Nongpoh Police Station-ona okamate sing·sandiaha aro da·o ia manderangni call detail-rangna sengkuenga.
“Chinga uamangni adita call detail-rangkode man·rikaha aro Sombaroba chinga uamangni call detail-rangko man·kugen. Uni gimin chinga uamangko Sombar salo sing·sandina okamattaienga,” ine Rathore aganenba, uamangni call record-rangko aro agananirangko ra·ani ja·mansa kakketko ma·sina man·gen ine parakataha.
Indake ong·engon, ia a·sel ong·ani somoio ka·gipa video internet-o ong·katani ja·man da·o ia a·selni bidingo police-rang, adita sakkirangko man·skaaha. Ia video-o mesokani gitade, ua somoio ia gario jangprete git watenba gariko AIUDF MLA-ni depante Anayutul Wadud minggipa mande salengachim aro unbaksa gipin sakbri manderang gario dongachim.
Gari a·sel ong·e me·chik saksa sianggipani bidingo police sing·sandia
Date:
Share post:
