Rim·a man·gipa manderangko M’laya-ona rimbapilna jotton ka·enga
SHILLONG: Re·anggipa May 23 tarikonin ‘gimae dongenggipa’ Sonam Raghuvanshi-ko Robibar walo, Uttar Pradesh a·dokni Ghazipur a·jao uni bame on·eani ja·man police-rang uko rim·aha.
Madhya Pradesh a·dokni Indore songjinmao bia ka·daldale re·bagipa Raja aro Sonam Raghuvanshi, May-ni 23 tariko Sohra jolona re·angani ja·man gimaahachim indiba Raja-ni sogimin manggisikode June-ni 2 tarikon, Sohra jolo donggipa a·kuang damsaoniko man·ahachim. Segipani manggisiko man·ahaoba Sonam-kode man·skakujaengani gimin police-rang, Sohra jolrango donggipa pilak biaprangonikon drone-rangchi sandibeaha indiba nikteljahachim.
May-ni 23 tariko, Raja aro Sonam-ni Mawlakhiat-chipakna re·angengmiting somoio uamang baksa ma·sina man·gijagipa tourist sakgittamkoba nikrikahani gimin police-rang, ia tourist sakgittamko sandina a·bachengataha aro uandaken ia mande sakgittam baksana sakgipinko, chong·motan Madhya Pradesh a·doko donggipa Indore songjinmaoni sakgittam aro Uttar Pradesh a·doko donggipa Lalitpur-oni saksako rim·na man·aha.
Uttar Pradesh aro Madhya Pradesh police-rangni dakchakanichi Meghalaya Police, UP a·doko donggipa Laddpur-oni bilsi 19 ong·gipa Akash Rajput, MP a·doko donggipa Indore songjinmaoni bilsi 22 ong·gipa Vishal Singh Chauhan, bilsi 21 ong·gipa Raj Singh Kushwaha aro Madhya Pradesh a·dokni Satna a·jao donggipa Basahari songoni bilsi 23 ong·gipa Anand Kushwaha-ko rim·na man·aha.
Ia mande sakgittamko rim·ani ja·man Sonam Raghuvanshi-ba Uttar Pradesh a·dokni Ghazipur a·jao donggipa Nandganj Police Station-o an·tangko bame on·eaha aro ukoba joljolan police-rang rim·aha.
Koborko on·ani gitade, Raja-ni jikgipa Sonam, rim·ako man·gipa manderangoni saksa Raj Singh Kushwaha minggipa mande baksa mikchagrika dongachim aro iani a·selsa uamang, Raja Raghuvanshi-ko so·ote galna miksongenba Meghalaya a·dokona re·baaha.
Sonam aro uni mikchagipa Raj Singh Kushwaha-ni gisepo pangnan phone ka·grikani aro message-rang watgrikaniko call detail records-oniko nikna man·aha aro iachin Meghalaya aro Madhya Pradesh-ni police-rang, dos dakgipa manderangko rim·na man·aha.
Meghalaya Police-rang, Uttar Pradesh aro Madhya Pradesh-ni police-rang baksa nangrime am·sandianirangko dakahani gimin bon·kamao Sonam kate dongchana amjae, UP Police-rangni mikkango an·tangko bame on·eaha ineba kobor on·timgiparang aganaha.
Raja-ko so·otanio sakgittam manderang, chong·motan Akash Rajput, Vishal Singh Chauhan aro Anand Kushwana mongsonggiparang ong·a aro uamangko Sonam aro Raj Kushwana, Raja-ko so·otna tik ka·timskaaha ine police officer-rang aganaha.
Indake ong·engon, ia jiksesako sandianio rakbee kamrangko ka·ahani gimin a·dok sorkari, Meghalaya Police, State Disaster Response Force (SDRF), National Disaster Response Force (NDRF), songni nokni manderang, West Jaintia Hills Monitoring Club, dingtang dingtang dolrang aro media-ni manderangkoba mittelpilangaha.