SHILLONG: Madhya Pradesh a·dokni Indore songjinmao bading chiwale cha·enggipa Raja Raghuvanshi-ko so·otanina matnanga man·enggipa mande sakbriko kachari, salsnina Meghalaya Police-ni ning·o donataha.
Raja-ko so·otanina matnanga man·enggipa bilsi 23-ni Anand Kurmi-ko Mongolbar salo, district court-o mikkangpaataha aro uko salsnina kachari, Meghalaya Police-ni ning·o donkuchina rai on·ataha.
Police-rangni u·iatani gitade, ia mandeko police-rangni ning·o donna gita Meghalaya Police bi·ahani gimin uko June 16 tarikona kingking transit custody-o donchina kachari rai on·ataha.
Bilsi 23 ong·gipa Anand Kurmi-ko Madhya Pradesh a·dokni Sagar a·jao rim·ani ja·man, Sombar salo Indore-ona rim·angaha aro Mongolbar salo uko Meghalaya Police, Indore songjinmani district court-o mikkangpaataha.
Raja Raghuvanshi-ko so·otanina matnangako man·enggipa gipin sakgittam manderang, chong·motan Raj Kushwaha, Vishal Chauhan aro Akash Rajput-koba iana skang Sombar salon kachario mikkangpaataha aro ia mande sakgittamkoba salsnina Meghalaya Police-ni ning·o donkuchina kachari rai on·ataha.
“Matnanga man·gipa mande sakbrikon Meghalaya-ni police-rang rim·ange, transit custody-o dongen,” ine police official aganaha.
Raja Raghuvanshi-ni jikgipa Sonam-ba, re·anggipa Robibar walon, Uttar Pradesh a·dokni Ghazipur a·jao donggipa Nandganj Police Station-o an·tangko bame on·eani ja·man police-rang rim·ahachim.
Raja-ni jikgipa Sonam, Raj Kushwaha baksa mikchagrikenba, an·tangni segipa so·otna gita adita sak manderangko tik ka·ahachim.
Raja aro Sonam, May jani 23 tariko gimaangaha indiba Raja-ni manggisikode June-ni 2 tariko man·ahachim.