SHILLONG: Umshyrpi dolongko tariengani gimin ia dolong gita re·ruraenggipa gari gorarangna East Khasi Hills a·jani Superintendent of Police (SP) office-oni adita niamrangko donataha.
SP office-oni u·iatani gitade, ia niamrang, June 12 tarikoni June 15 tarikona attam 10:00 bajioni pring 5:00 bajiona ong·gen.
Ia somoirango, Upper Shillong-oni Umshyrpi dolong (MES Point)-chipakna re·angenggipa garirang, Upper Shillong-ni 5th Mile-oni, Pomlakrai, Laitkor, Madanrting, Laitumkhrah aro uandakgipa biaprang gita re·skana nanggen.
Apsan daken, Lumdiengjri joloni ba Old Cherra-chipakni Umshyrpi dolong gita Upper Shillong-chipakna re·angenggipa garirangba, Madanrting, Laitkor, Pomlakrai, 5th Mile, Upper Shillong aro uandakgipa biaprang gita re·skana nanggen.
Indake ong·genchimoba, nangchongmotna re·ruragipa garirang, jekai ambulance, fire & emergency service ba uandakgipa garirangde pangna re·ronga gitan re·na man·aigen ine SP office-oni u·iataha.