AHMEDABAD: London songjinmani Gatwick Airport-ona bilangna sienggipa Air India flight AI171, Bristibar salpaksachibara, Ahmedabad songjinmani Sardar Vallabhbhai Patel International Airport-oni bilchakatani ja·man bakan airport sambaon ga·akonenba goprete a·sel ong·aha.
Ia sildoreng a·sel ong·ani ja·man, Ahmedabad airport-o pilak sildorengrangni bilruraanikoba dontongatchengaha.
“Sardar Vallabhbhai Patel International Airport-ko da·o dikdiksana chipatchengaha aro ia airport-ona sokbaani aro re·anikoba adita somoirangna dontongatchengaha,” ine Airport-ni official-rang parakataha.
Ia a·selni bidingo sing·sandiatna nangenggipa nokdangrangna, Air India-ni gita dingtangmancha 1800 5691 444 emergency nombor a·bachengataha ineba official-rang parakataha.
Ia sildoreng a·sel ong·anio sianggipa ba tangrikenggipa manderangni giminde da·o dipet Airport official-rangoni maming u·iatanirang dongkujaengoba, ia sildorengo songreangenggipa sak 242-oni saksade tangrikaha ine koborko man·soaha.
Ia sildoreng ga·akchakgipa biaprango nokrangni nosto ong·anirangko aro medical hostel damsao sildorengni nappruaniko dingtang dingtang noksarangoniko niksona man·aha.
Boeing 787-8 Dreamliner sildorengo, sak 242 songregiparangko gate, Ahmedabad airport-oni Bristibar attam 1:38 bajio bilchakatahachim indiba bilchakataoni minute bonga ja·man ia sildoreng, airport-ni sambao donggipa Meghani Nagar gittimo ga·akone a·sel ong·aha.
Ia sildoreng ga·akonani ja·man rang·san gopretaha aro ua biapo wa·al ching·gaoe wal·ku ong·anirangkoba nikna man·aha.
Official-rangni u·iatani gitade, ia sildorengko Captain Sumeet Sabharwal aro First Officer Clive Kundar-ni dilanichi chalaiengachim.
Directorate General of Civil Aviation (DGCA)-ni parakatani gitade, bilchakatani ja·man dikdiksani gisepon sildorengni pilot, Air Traffic Control (ATC)-na ia sildorengni obostako u·iatahachim indiba bakan ia sildoreng a·ao ga·akone gopretaha.
Sildoreng a·sel ong·a bakan ua biapona komibeoba wa·al kimitgipa gari bolsni aro dingtang dingtang biaprangoni National Disaster Response Force (NDRF)-rangko watataha.
Ia a·selni bidingo DGCA am·sandina a·bachengataha aro a·sel ong·gipa sildorengko nina gita Aircraft Accident Investigation Bureau (AAIB)-oniba dolsa official-rangko watataha ine official-rang aganaha.
Official-rangni u·iatani gitade, ia sildorengo songreanggipa sak 242 manderangoni sak 169-de India-ni, sak 53-ni Britain a·songni, sak 7-de Portugal a·songni aro saksade Canada a·songni ong·achim. Ia sildorengo dongpagipa manderangoni saksade Gujarat-ni gitcham Chief Minister Vijay Rupani ong·achim ineba kobor on·aha.
Ia a·sel ong·ani ja·man Union Civil Aviation Minister Ram Mohan Naidu-ba ia a·selni bidingo ma·sie ra·na gita ua biapona re·angaha.
A·songni Prime Minister Narendra Modi-ba ia a·selna an·tangni suk ong·gijaniko parakatenba, dakchakanirangko nangenggipa manderangna ta·raken kamrangko ka·china ge·etaniko on·ataha.
Indake ong·engon, ia a·sel ong·anichi kalimenggipa nokdang ge·antinan gong krorprak tangkarangko on·na gita Tata Group-oni ku·rachakaniko on·ataha.