TURA: Dalu jolrango bijoli on·aniko name nirok sandijaengani a·sel jolo songdongenggipa manderang neng·nikanirangko chagrongna nangtokenga ine dingtang dingtang NGO-rang, chong·motan Nokrek Area Development Committee (NADC), Garo Students Union (GSU) Ashugre regional unit, Garoland State Movement Committee (GSMC) Ashugre regional unit aro Federation of Khasi Jaintia & Garo People (FKJGP) Chokpot unit, Sai Computer Ltd aro MePDCL Dalu Sub-Division-ni kosako, a·dokni Power Minister AT Mondal-na badi ka·doataha.
NGO-rangni Power Minister-na badi ka·doangani gitade, ia jolrango bijoli on·aniko name nirok sandijaengani a·selan a·rak wachi sin·kari ding·kari bijoli sirongaia aro badiaba somoirangode mitam songrango, antignimangna batpilen bijoliko man·jani a·sel manderang, mongsongbate poraienggipa chatro chatrirang neng·nikanirangko chagrongna nangronga.
Dalu MePDCL Sub-Division-o lineman-rangba chu·onga gita dongjani a·selan da·o gita bijoli nosto ong·ani somoirango bijoliko tarina kam ka·giparang chu·ongjaenga ineba NGO-rang parakataha.
Ia jolrango nosto ong·gimin bijoli krongrang bang·en donga aro ian manderangnasan ong·aigija pilak janggi gnanggiparangnan kenchakna nangani ong·enga ineba NGO-rang, Power Minister-na sedoatgipa chittio parakataha.
Bill-rangko on·ani bidingo janapatskaengon, ia jolrango bijoli jakkalenggipa pilak nokdangrangnan nangana bate bill-rangko sokatengani a·sel manderang, mongsongbate kangal cholgrirang neng·nikanirangko chagrongna nangtokenga ine NGO-rang parakataha. Badiaba nokdangrangnade bill-rangko jasaon changgni dake sokatenga aro badiaba biaprangode sigimin ba donggijagipa nokdangrangnaba bill-rangko sokatengkua ineba NGO-rang parakataha.
Ia jolrango bang·bata nokrangon meter-rang nosto ong·ani a·sel bill-rang nangana bate sokenga ine janapatskaengon, nosto ong·gimin meter-rangni pal gitalko teksrechina gita baditaba chang u·iatahaoba ia meter-rangko teksrechipja ine NGO-rang matnangataha.
Bijoli siliting sambarango donggipa bol cheksirangko rongtalatrongjaengani a·selan balwa ta·rakani somoirango bolrang ba bol cheksirang be·dape bijoli line-rangko nosto ka·rongenga ineba NGO-rang parakataha.
Mitam nok kosakrang gita bijolini mongsonggipa line-rangko ra·sotaniara, manderangna kenchakna nangani ong·enga ine iandakgipa line-rangko dingtang biap gita salskachinaba NGO-rang didiataha.