TURA: West Garo Hills a·jani Demdema aro Selsella Block Resource Centre (BRC)-o Scheduled Tribe (ST) category-oni ong·gijagipa aro joltangni ong·gijagipa candidate-rangko Block Resource Person (BRP)-ni kamna ra·aniko dingtang dingtang NGO-rang jegalatani ja·man Tikrikilla Block Resource Centre (BRC)-oba Tribal ong·gijagipa candidate-rangko BRP-ni kamna ra·ahani gimin Garo Students Union (GSU) Western Zone (West) Raksamgre jegalataha.
Iani bidingo West Garo Hills a·jani District Mission Coordinator (DMC)-ba badi ka·e sedoatengon, Tikrikilla BRC-o BRP-ni kamna seoka man·gipa manderangara, ST gadangoni ong·jani gimin jolo songdongenggipa manderangni nangnikani gita ong·jaenga ine GSU-WZW Raksamgre-ni general secretary Tengroang R Marak parakataha.
“Tikrikilla jolon lekka pora donggipa aro kamni gimin u·i-ma·sigipa chadamberang bang·en donga aro ia kamrangko man·na kraa. ST category-ni ong·gijagipa candidate-rangko Tikrikilla BRC-ni BRP-na seokaniara joltangni manderangkon nichanggalani gita ong·enga,” ine GSU parakataha.
Tikrikilla-o BRP-ni kamna ra·gipa candidate sakgniko ra·galpilenba, gital dake candidate-rangko seokpiltaichina West Garo Hills a·jani DMC-ko didiatengon, Tikrikilla-o atchikame songdongkamgipa aro A·chik candidate-rangna skanggipa cholrangko on·chengchina GSU dabiangaha.
“Tikrikilla BMC-o BRP-ni kamna ra·gipa candidate sakgniara ST category-oni ong·jani gimin ian Reservation Policy-ko pe·ani gita ong·enga aro iako chinga raken jegala. Uni gimin ia block-o BRP-ni kamna candidate-rangko gital dake seoktaipilchina chinga dabienga,” ine GSU-WZW Raksamgre parakataha.