SHILLONG: Batanggimin changrango Secondary School Leaving Certificate (SSLC) porikkako February-March jarangosa ong·atahaoba ia changode December jaon ong·atna siengani gimin a·dokni Education department, kamrangko ka·chichasoengaha.
SSLC porikkako December jao ong·atani bidingo talatanirangko on·angengon, pilak skulrangan SSLC porikkani form-rangko, August aro September jani gisepon Meghalaya Board of School Education (MBOSE)-ona sokatna nanggnok ine Education department u·iataha.
Selection Test-rangko ong·atani bidingo talataniko on·angengon, MBOSE-o bak ong·enggipa skulrangde Selection Test-ko ong·atani tarik aro format-ko an·tangtangan tik ka·na man·gen indiba Selection Test-ko ong·atna nangtela ong·ja maina skulrang, an·tangtangni chatro chatrirangko, uamangni half yearly aro gipin porikkarangoniko nina man·aigen ine Education department parakataha.
MBOSE-o bak ong·gijagipa skulrangnade District School Education Officer (DSEO)-rang, 2024 bilsio ong·atgipa Selection Test-ni format-ko ja·rike, dingtangmancha selection test-ko ong·atangskagen.
Education department-ni u·iatani gitade, SSLC porikkako December jani gnigipa antio a·bachenggen aro December-ni 19 tariko ba una skangan matchotatgen. Iani bidingo MBOSE-ni gita talbate u·iatanggen.
Krismas aro Bilsi Gital manianio maming nangchakeanirang dongjana gita evaluation ba nipilanirangko 2026 January jani gnigipa antioni a·bachenggen ineba department-oni u·iataha.
SSLC porikkani result-rangko 2026 February jani gittamgipa antio parakgen aro Supplementary SSLC porikkako March jao ong·atskae, result-rangko April jani skanggipa antio parakgen.