TURA: South Garo Hills a·jani Bagangre songo, sorkari skul nokko rikna kam man·gipa contractor, kamko a·bachengchipkuja ine South Garo Hills-ni social activist Greneth M Sangma, School Education & Literacy-ni Director-na badi ka·doangaha.
Sangma-ni parakatani gitade, ia contractor-ara, Tura Fancy Valley-oni M/S Shivin Construction ong·achim aro ia skul nokko rikna gita 2024 bilsini June jaon gong 44,79,448 tangkarangko chame on·ahachim.
Da·alonan kamko a·bachengchipkujaengani a·sel ia skulko ramram nok dakesa chalaina nangkuenga ine Sangma parakataha.
“Ia skulara, Chokpot C&RD Block-ni Silkigre police station ning·o ga·akgipa skul ong·a aro ia skulko 1975 bilsion kulie da·o ia skul bilsi 50 gapengahachim. Ia skul nokko da·onan rikna a·bachengkujaengani a·sel skigiparang aro skulo poraienggipa bi·sarangba neng·nikanirangko chagrongna nangtokenga,” ine Sangma parakataha.
Ia contractor-ni kosako rakgipa ja·kurangko de·china aro una on·gipa work order-ko den·galpilchina DSEL-ko didiatengon, ia skul nokko ta·rake matchote on·na man·na gita ia kamko ka·dongchakna man·gipa contractor-na on·skachina Sangma mol·molataha.