TURA: Chief Minister-ni post matric chatro chatrirangna ku·rachakgimin scholarship-ko chu·onga gita man·jaenga ine Tura-ni MDC aro BJP-ni state vice president Bernard N Marak matnangatenba, ia scholarship-ni tangkarang bano gimaenga ine sing·doataha.
Marak-ni parakani gitade, matric porikka pass ka·gimin chatro chatrirangna central scholarship baksana gong 6000 ka·e CM Scholarship-ko on·na budget session-ni somoio, a·dokni Chief Minister Conrad K Sangma an·tangan ku·rachakaniko on·ahachim.
Indake ong·genchimoba, badiaba college-rangode chatro chatrirang, mitam gong 1500, mitam gong 2000 aro mitamrang gong 3000 ka·esan CM Scholarship-ko man·skaenga ine Marak parakatenba, Chief Minister-ni ku·rachakgimin bangki scholarship-rangara bano gimaenga ine sing·doataha.
“Chief Minister-ni budget session-o ku·rachakgimin gita mitam chatro chatrirangde gong 6000 ong·gija scholarship-ko man·enga ine badi ka·anirangko man·soahani giminsa anga iani bidingo CM office-na u·iatna nangnikaha,” ine Marak parakatenba, iani bidingo jinmana talataniko on·china CMO-ko didiataha.
“Iandake CM Scholarship-ko chu·gimik man·tokjaengani a·selan chatro chatrirangni gisepo jajaanirang ong·katenga. Uni gimin mikkangchi chatro chatrirangni gisepo maming jajaanirang dongjana gita aro cholgri ong·pagipa chatro chatrirangna namgni ong·china gita ia scholarship on·aniko niatchina aro talataniko on·china anga CMO-ko mol·molenga,” ine Tura MDC parakataha.