SHILLONG: Budget Session-ni somoio chatro chatri sakprakna gong 6000 ka·e parakatgipa Chief Minister’s Scholarship scheme-ni tangkarangko chatro chatrirang chu·gimik man·jaenga ine Tura-ni MDC aro BJP-ni state vice president Bernard N Marak-ni matnangatani ja·man, da·o dipet ia CM Scholarship scheme-kode officially a·bachengkujaenga aro manderangni ma·sisretenggipa scheme-ara Umbrella Scholarship-sa ong·a ine Sombar salo, a·dokni Education Minister Rakkam A Sangma talataniko on·angaha.
Iana skang,Chief Minister-ni post matric chatro chatrirangna ku·rachakgimin scholarship-ko chu·onga gita man·jaenga ine Tura-ni MDC matnangatenba, maini a·sel chatro chatrirang Chief Minister-ni ku·rachakgimin gita chu·gimik scholarship-ko man·jaenga ine talataniko on·china Chief Minister-ni Office (CMO)-ko didiatahachim.
Iani bidingo talataniko on·angskaengon, da·o dipet CM Scholarship scheme-ko officially a·bachengkuja aro ia scheme-na biming segatanirangko a·bachengna gita bakan officially u·iataniko on·anggen ine Education Minister parakataha.
“Mitam manderang CM Scholarship scheme-ko da·o on·enggipa Umbrella Scholarship baksa ma·sisretenga. CM Scholarship-de dingtang scheme-sa ong·a aro ia scheme-ko a·bachengna gita chinga da·o kamrangko ka·engaha. Bakan chinga iani bidingo chatro chatrirangna u·iatgen,” ine Sangma aganaha.
Education Minister-ni parakatani gitade, da·o man·enggipa central scholarship baksana post matric chatro chatrirang, a·dok sorkarini ku·rachakgimin gita CM Scholarship-koba gong 6000 ka·e man·gen.
“Ian a·dokni chadamberangko ra·dona gita sorkarini ka·enggipa kamrangoni mingsa bak ong·enga,” ine Sangma aganaha.