MANGSANG: East Garo Hills a·jani Mangsang jolo donggipa skul nokrang namsrangjahani gimin ia skul nokrangko ta·raken taripile on·china GSU aro FKJGP Mangsang unit-rang baksana jolo songdongenggipa manderangba a·dok sorkariko didiataha.
Mangsang jolo komibeoba damsni skulrang taripile on·aniko nangengon, Rongchong Government LP skul aro Ronga A·gal Adhoc UP skulrangba ta·raken taripile on·aniko nangenga ine dolgni NGO-rang u·iataha.
Rongchong Govt LP skulara, Mangsang-oni kilometer 5-mang chel·ao donggipa skul ong·a aro ian Adokgre-Mangsang ramaoni km 1-mang chel·grika.
Ia skulo skigipa sakgittam donga aro sak 60-na baten poraienggipa chatro chatrirang donga. Ia skulo bakgni dake nokrang donga aro baksakode 2012-2013 bilsirango mikka balwa ta·rakani somoion nosto ka·angaha indiba gipin bakkode skigiparang staff room dakna aro class-rangko ra·na jakkalengkuachim. Ia kutturi ge·gniba gipin bakrang gitan jakkalna namsrangjahani gimin re·anggipa bilsiosan ia kuturi ge·gnikode taripilaha ine kobor on·aha.
Bilsi 10-mangna skang ia skul nokko mikka balwa nosto ka·angaonin ia skul jakkalna namjaha ine kobor on·timgiparang parakataha.
“Ia skulni kuturi ge·gittam aro babilsi donggipa nokni nokking chu·gimikkon mikka balwa pe·angaha aro iani bidingo changni chang education department aro jolni MLA-na u·iatahaoba maming dakchakanirangko man·chipjaha,” ine skulni skigiparang parakataha.
Ia skul nokko rikna sorkarioni maming dakchakanirangko man·jahani gimin ja·mano songni manderangsa nokking pinna gita tinrangko on·e dakchakaha indiba mikka balwa pe·anggipa nokkingara pucca-sa ong·ani gimin da·o skul nokni nokkingko wa·arangchisa tinko kagepna nangaiaha aro ian da·o gita mikka waani somoirangode batesa mikka selpruprue, mikka waani somoirangode skulko chutti watna nangaia ine skulni skigiparang parakataha.
Ia skul nokni do·ga, kelki aro pakmarangba namsrangjae da·o skul ka·na neng·nikanirangko chagrongna nangengaha ineba kobor on·timgiparang parakataha.
Ia skulni babilsiba nosto ong·ahani a·sel da·o skulo poraienggipa bi·sarangna mi bijakrangko song·timgipa mande, an·tangni nokosa song·e ra·baenga aro bi·sarangna mi bijakrangko on·na man·paenga ineba skigiparang parakataha.
Apsan daken, Ronga A·gal Adhoc UP skulba neng·nikanirangko chagrongna nangenga ine Mangsang-ni GSU aro FKJGP dolrang parakataha.
Ronga A·gal songara Mangsang-ni km 3-mang chel·a aro ian Adokgre-Mangsang ramani sambao donggipa song ong·a. Ia skulo poraienggipa chatro chatrirang sak 60-mangni gita donga aro ia skuloba skigipa sakgittam kamko ka·enga. Ia apsan biapon damgipin sorkari LP skulba donga aro ia compound-ni sambaon damgipin private skulba donga ine kobor on·timgiparang u·iataha.
Kobor on·timgiparangni u·iatani gitade, ia skulkoba bilsichetna skangan mikka balwa nosto ka·angani a·sel jakkalna man·jaha aro ia UP section-o donggipa kuturi ge·gittamon kelkirangba dongja aro do·garangba mikkani a·sel da·o onan man·jaha. Mikkarang waahaode ia skul nok gimikon chi nape mande napnan man·jaha ineba kobor on·timgiparang parakataha.
Ia skul nokni nokkingrang selprupruahani a·selan mikkarang waahaode class-rangko ra·na man·jaha ineba kobor on·timgiparang aganaha.
Ia skulo skie on·enggipa manderangni aganani gitade, iandakgipa neng·nikanirangko chagrongna nanggenchimoba uamang salantian class-rangko ra·aiachim indiba mikka waahaode chutti watana agre maming chol dongjaha.
“Ia skulo kuturi ge·samangmangsan jakkalna namaiaha aro ia kuturiko staff room aro nangchongmotgipa file-rang, ki·taprang aro gipin lekkarangko donchakna jakkalenga,” ine skulni headmaster parakataha.
Ia skul nokko rikpiltaie on·china gita changni chang sorkarina aro gipin official-rangnaba u·iatahachim indiba maming dakchakanirangko man·teljahani gimin songni manderangko mol·mole, re·anggipa bilsiosa songni manderang, MGNREGS-ni tangka paisarangchi kuturi ge·gniko rike on·aha indiba ian chu·ongkujaenga maina ia skulo gipin class ge·gittamkoba ra·na nangenga ine kobor on·timgiparang parakataha.