SHILLONG: NPP-chi dilenggipa Meghalaya Democratic Alliance (MDA) sorkari, krorni kror tangkarangko koros ka·e dingtang dingtang scheme-rangko aro program-rangko ra·gatengoba, a·doko maming dingtanganiko nikna man·jaenga ine Voice of the People’s Party (VPP) matnangataha.
Iani bidingo kobor ra·timgiparang baksa agangrikengon, sorkarini ‘dal·dalgipa’ kattarangko bebera·jachina aro iandakgipa scheme-rangchi mai namgnirangko man·enga, uarangni bidingo sorkariko sing·dochina gita VPP-ni dilgipa Batskhem Myrboh, a·dokni manderangko didiataha.
“Sorkari scheme-rangko a·bachengate, gong krorni kror tangka paisarangko koros ka·aha ine parakatenga indiba sing·anide, iandakgipa scheme-rangchi mai dingtanganiko nikna man·aha?” ine Myrboh aganaha.
Lekka pora aro sanna banani kamrango sorkarini a·kangani aro chong·mot obostarangni dingtanggrikani giminba ua toe janapataha.
“Lekka porani kamrangna sorkari, iako dakaha, uko dakaha ine aganenga indiba Performance Grading Index (PGI) ranking-ode Meghalaya-ko bon·kamgipa biaposa donataha. Indide mai dingtanganiko ra·baaha?” ine VPP-ni dilgipa sing·doataha.
Myrboh-ni aganani gitade, badita ming scheme-rangko ra·gataha ba badita tangka paisarangko chamaha, iarangchi sorkarini chu·sokaniko toaniara manderangko dilsretna jotton ka·anisan ong·aia.
“Ian bol ge·ani gitasan ong·aia. An·ching maming saloba badita pang bol charako ge·aha, ukode chanjawa indiba an·chingni ge·gipa bolrangoni badita pang tange dongenga, ukosa chana. Sorkarini kamrangde biterangkosa mesokna man·na nanga, scheme-rangko ong·ja,” ine Myrboh aganaha.
2023 bilsio a·bachengatgipa FOCUS aro FOCUS+ gita dakgipa scheme-rangni giminba VPP, sorkariko sing·doataha.
“Ia scheme-rangchi mai dingtanganiko ra·bana man·aha? Manderangni tangka man·gnirang baridapahama? BPL nokdangrangko kangal cha·a-siaoniko ra·ongkatna man·ahama? A·dokni manderang pilakan an·seng baljokani cholrangko man·engahama?” ine Myrboh sing·doataha.
Sorkarini kamrangko manderangni namgnina chu·sokatjaenga ong·ode je gita tangka paisa chamgipa program-rangba indin ku·rachakgramaianisan ong·aia ineba ua aganaha.
“Kamrangko mesoknade report card dongna nanga. Biterangko mesokgija jakra jakasi aro jangchi pilaknan tangkarangko goe rona man·jawa. Sorkarini kamde manderangnasa nangchakeaniko ra·bana man·na nanga,” ine VPP-na ku·wattimgipa Myrboh parakataha.