Ia a·selni bidingo rim·a man·giparang sak 8 gapengaha
SHILLONG: Indore songjinmaoni re·bagipa tourist Raja Raghuvanshi-ko Sohra jolo so·otani bidingo Meghalaya Police-ni Special Investigation Team (SIT) sandirokanirangko dakkuengon, Raja-ko so·otani ja·man uni jikgipa Sonam-ni Madhya Pradesh a·dokona re·angpile dongnuchakgipa nokni nokgipa mande saksakoba Gwalior songjinmaoniko Sombar salo rim·na man·aha.
East Khasi Hills a·jani Superintendent of Police (SP) Vivek Syiem-ni kobor ra·timgipa manderangna parakatani gitade, ia mandeara Indore songjinmao donggipa Dewas Naka minggipa nokni nokgipa Lokendra Singh Tomar ong·a aro ia mandeni nokon, Raja Raghuvanshi-ko so·otna tik ka·dilgipa Sonam, uko so·otani ja·man Madhya Pradesh a·dokona re·angpile dongnue dongahachim. SIT-ni u·iataniko man·soani ja·man ia mandeko, Gwalior songjinmani Police-rang rim·aha ineba Syiem parakataha.
Rim·ako man·gipa Tomar, June-ni 16 tariko Madhya Pradesh a·dokoni Uttarakhand-ona re·angaha aro June-ni 22 tarikosa ua Gwalior-ona re·angpilaha ineba SP aganaha.
“Sonam-ni dongnuchakgipa nokni nokgipako Gwalior-ni police-rang rim·aha aro da·o uko rim·na gita Meghalaya Police-ni SIT, Indore-oni Gwalior-ona re·angenga. Gwalior-ona sokangani ja·man ia mandeko SIT, kachariona rimange, Meghalaya a·dokona rimbana bi·gen,” ine Syiem aganaha.
Ia mandeko police-rang, Raja Raghuvanshi-ko so·otanio mongsonggipa sakkirangko aro bosturangko nosto ka·e galahani gimin rim·na sandiengachim.
Iana skangsan Meghalaya Police-ni SIT, Silome James aro security guard Balbir Ahirbar minggipa mande sakgnikoba rim·ahachim aro da·o Sonam-ni dongnuchakgipa nokni nokgipa Tomar-koba rim·ahani gimin ia mande sakgittamko sing·sandikuna gita Meghalaya a·dokona rimbanaba gnang.
Silome James-kode police-rang, Sonibar walon rim·aha aro security guard Balbir-kode Robibar salo rim·skaahachim.
Silome James-ko rim·ani ja·man, Sonam-ni bag-ni gimin sing·sandion, ua police-rangko, uni so·e galgipa biapona rimangaha aro ua biapo so·e galgimin Sonam-ni bag-ko man·eahachim.
Ia sakgittam manderangko channe da·o Raja Raghuvanshi-ko so·otani case-o rim·a man·gipa manderang gimik sakchet gapengaha.
Koborko on·ani gitade, ia bag-kon Meghalaya Police-ni SIT, batanggimin salbongana kingking Indore songjinmaoniko sandiengachim. SIT official-rang, Sonam Raghuvanshi-ni nok aro uamangni plywood karkanarangonikoba ia bag-ko sandiaha aro nokdangni manderangoba sing·sandiahachim. Ia bag-o gong lak 5 tangka baksana pistol pongsa, Sonam-ni phone aro Raja-ni gamchatgipa bosturangba dongachim ine official-rang aganaha.