SHILLONG: Seokgimin sorkari skulrangko chalaina gita adita salrangna skang a·dokni Education department aro Mothers Union-ni gisepo bilsi bongana Memorandum of Understanding (MoU)-o soi ka·grikani bidingo adita ma·sisretani aro jajaanirang ong·engani gimin a·dokni Education Minister Rakkam A Sangma, iana talatanirangko on·angaha.
Sorkari skulrangko chalaina gita Mothers Union-na pakwate on·enganichi skigiparangna, mongsongbate skigiparangni dormaharangko on·anio nangchakeanirang dongnaba gnang ine skigiparangni gisepo kenchaksoanirang ong·katahani gimin Education Minister, iana talataniko on·angaha.
“Da·o dipet chinga seachi badi ka·anirangkode man·soa dongkuja indiba adita jajaani aro ma·sisretanirang ong·enga ine chinga ma·sia. Mothers Union baksa Education department-ni MoU-o ka·aniara, sorkari skulrangko bakrima chalaina miksonganisan ong·aia aro iano sorkarini kamko uamangna on·skagen ba skigiparangna dormahako uamangsa on·gnok ia katta ong·ja,” ine Sangma aganaha.
Ia songgigrikanio sorkari skulrangko chalaina Mothers Union-na pakwate on·engoba, skigiparangni kam aro dormaharangde sorkarini ning·on ong·aigen ineba Education Minister talataniko on·angaha.
“Skigiparangni dormahako skango gitan sorkarian skigiparangna on·angaikugen aro iano maming dingtangani dongjawa. Ia songgigrikanio Mothers Union-ni kamde School Managing Committee (SMC)-ni kam gitasan ong·aigen aro skigiparangni kam aro dormaharangkode on·aniode maming bil dongjawa,” ine Sangma aganaha.
Sorkari skulrangko chalaianio Mothers Union-ni ka·na sienggipa daitorangni gimin janapatengon, Mothers Union-o bang·bata me·chikrangan neng·takgimin skigiparang aro officer-rangsa ong·ani gimin uamang an·tangtangan mitam skulrangkode jako ra·e nirokna an·tangtangko on·kangaha aro ia skulrangko namdapatani aro namroro silroroatanian uamangni kam ong·gen ine Education Minister parakataha.
“Uamang an·tangtangan skie on·naba ku·rachakenga aro je skulrangon bi·sarang poraiako dontongahachim, uandakgipa skulrangoba bi·sarangko skul napattaina kang·kare kaaha,” ine Sangma aganaha.