AMPATI: South West Garo Hills a·jao skanggipa changna Te·brong Festival-ko Mongolbar salo, SWGH District Administration aro Tourism Department nangrimenba, Ampati-ni Multi Facility Centre-o ong·atangaha.
Ia Te·brong Festival-ko ong·atanio, South West Garo Hills a·jao songdongenggipa dingtang dingtang jatrang, sorkari department-rang, self help group-rang aro bading chiwalgiparang bak ra·angtokaha.
Ia Te·brong Festival-ko ong·atanio, Mahendraganj-ni MLA Sanjay A Sangma, Rangsakona-ni MLA Subir M Marak, Deputy Commissioner Hema Nayak, Superintendent of Police (SP) Vikash Kumar, dingtang dingtang department-ni officer-rang, chatro chatrirang aro songni manderangba bak ra·angtokaha.
Ia Te·brong Festival-ko ong·atanio dam 10 stall-rango, te·brongoniko tarigimin ma·manti bosturangko mesokangaha aro iano dingtang dingtang self help group (SHG)-rangba an·tangtangni tarigimin bosturangko mesokna aro palna sim·na cholko man·aha.
Ia Te·brong Festival-ko ong·atanio dingtang dingtang susaanirang, jekai A·chik bijakrangko song·susaani, te·brong cha·susaani, jrebatgipa te·brongna susaani aro uandakgipa gipin program-rangkoba ong·atangaha.
Ia manianio, git ring·anirang aro dingtang dingtang department-rangni gisepo budu salgrikanirangko ong·atanichiba manderangko an·saoatangaha.
Ia tom·anio Mahendraganj-ni MLA Sanjay A Sangma, jinmana aganprakengon, te·brong bite aro te·brong bolrangni gamchatani bidingo agan-talatanirangko on·angaha.
Apsan daken ia tom·anio Rangsakona-ni MLA Subir Marak-ba jinmana aganprakengon, be·enni namgniko man·na gita te·brongko cha·china gita jolni chadamberangko didiangenba, ‘Nokma’ ice-cream-ni nokgipa Muktidata Multipurpose Society Ltd gita dakgipa dolrangni chu·sokanirangko agan-janape on·angaha.
Iana skang, South West Garo Hills a·jani Deputy Commissioner Hema Nayak-ba ia program-ko ong·atani bidingo talate on·angengon, South West Garo Hills a·jao gama ge·ani aro na·tok jile cha·ani cholrangni gimin aganangaha.
Ia tom·anio dongpae jinmana aganprakanggipa gipin manderangara, SWGH a·jani ADC Dolrich BG Momin, Tourist Officer Colin Jeffrey Ch Marak aro gipinrang ong·a.
Jatni bijakrangko song·susaanio Jeshmina S Marak, Te·brong cha·susaanio Remington Sangma aro jrebatgipa te·brongna susaanio, kg 37.89 ong·gipa te·brongna Arfeush S Sangma chegipa ong·skaaha.
