TURA: Skulrango skigiparangna aro skulrangko chalaienggipa dingtang dingtang managing committee-rangna u·iatchenggija aro apsan chanchirimchenggija, Garo Hills-ni adita sorkari skulrangko chalaina Mothers Union baksa Memorandum of Understanding (MoU)-o soi ka·aniara lekka porani kamrango skigiparangko aro skulko chalaienggipa managing committee-rangko nichanggalani gita ong·aha ine All Meghalaya Primary School Teachers Association (AMPSTA) parakatenba, ia MoU-ko den·galpilchina a·dok sorkariko didiataha.
Sorkari skulrangko nambate chalaina aro nirok sandina man·na gita Garo Hills-ni dam 20 skulrangko chalaina adita salrangna skangsan a·dokni Education Department, Mothers Union baksa MoU-o soi ka·grikangahachim ine nikna man·a.
Indake ong·engon, ia skulrangko Mothers Union-chi chalaina gita MoU-o soi ka·grikna skang, skulrango skigiparangna aro skulko chalaienggipa dolrangna u·iatchengjahani gimin AMPSTA, sorkariko jegalatenba, Mothers Union baksa soi ka·grikgipa MoU-ko den·galpilchina didiataha.
Iani bidingo a·dokni Chief Minister Conrad K Sangma-na sedoatengon, “Ia MoU-ni Clause No. 1 sub-clause (c)-o Mothers Union-na an·tangtangni ska gita niamrangko tarina bil on·ahani gimin ian mikkangchi skigiparangna neng·nikanirangko ra·bagen ine chinga kenchakenga. Ia niamko name nichenggija tarianiara namen jajrengna nangani ong·enga. Unbaksana Clause No. 2 sub-clause (e)-oba skigiparangna dormaharangko on·anio No Objection Certificate (NOC)-ko on·na Mothers Union-na bilko on·aha. Iako chinga raken jegalenga maina ian dormaharangko on·anio ru·utataniko ra·bagen aro skigiparangna dormaharangko man·anio neng·nikanirangko ra·bagen,” ine AMPSTA parakataha.
Una agreba ia MoU-o skigiparangko kam apjitna gita Mothers Union-na bilko on·engani giminba AMPSTA raken jegalataha aro iako department-ni ning·on donaichina dabiangaha.
“Manderangni tangka paisarangchi chalaienggipa sorkari skulrangko maini gimin NGO-chi chalaina on·na nangenga? Sorkari skulrangko chalaina NGO-rangna pakwatanichide nambate biterangko man·na dakchakani ong·jawa, batesa meligrikgijani, ma·sisretgrikani aro jatni gisepon bak dakaniko ra·baani ong·gen. Mothers Union-de pressure group-sa ong·ani gimin badiaba somoirango sorkari baksa maiba kamrangna golmalrang ong·na nanggenchimode, haida uamangni lekka porani kamrangoba nangchakeaniko ra·banaba gnang,” ine AMPSTA parakatenba, Mothers Union baksa soi ka·grikgipa MoU-ko jasani gisepon den·galpilchina dabiangaha aro ia dabianiko jasani gisepo chu·sokatjagenchimode a·dok gimikon jingjengatanirangko dakanggen ine mikrakataniko on·angaha.