TURA: Chief Minister’s Career Guidance & Counselling Scheme-ni ning·o North Garo Hills District Administration-ni dakchakanichi re·anggipa Sombar salo, Career Guidance program-ko chadamberangna, Dainadubi jolo donggipa Chima A·pal songo ong·atangaha.
Ia Career Guidance program-ko Chima A·pal Matgrik Cultural & Sports Club ong·ataha aro ia program-o Dainadubi PHC-ni Dr Somban Sangma, Mendipathar College-ni gitcham Principal AG Momin aro Mendi Salpara Baptist Mondolini Pamong Kalseng K Marak bak ra·angenba, jolo donggipa chatro chatrirangna aro chadamberangna, janggi tanganio chu·sokgiparang ong·na gita bimchipe poraichina agan-ku·pattianirangko on·angaha.
Sorkarini kamrangosan pangchake dongaigija dingtang dingtang bading chiwalani cholrangko dake ra·china aro an·tangtangni changa sapanirangko jakkale, an·tangtangna janggi tangani cholrangko dake ra·china gitaba ia program-o skie on·giparang, chadamberangko aro chatro chatrirangko didiangaha.
Indake ong·engon, songo noko donggipa chadamberangna aro chatro chatrirangna ia Career Guidance program-ko ong·atna dakchakahani gimin Chima A·pal Matgrik Cultural & Sports Club-ni dilgiparang, North Garo Hills a·jani District Administration-ko mittelpilangaha.
