RESUBELPARA: North Garo Hills a·jao, me·chik saksani auako time nianina Daram Tekalang songni Mikseng B Marak minggipa mandeko, POCSO court, bilsisana pattoko donchina aro gong 1000 tangkako dai dake gamchina rai on·ataha.
Koborko on·ani gitade, ia obosta ong·ani, 2019 bilsini December 26 tarik attamni 4:00 bajimango ong·aha aro iani bidingo me·chikni ma·drangrang FIR ka·ani ja·man, dos dakgipa mandeko police-rang rim·aha.
FIR-ko man·soani ja·man ia obostako WPSI Bailine Sangma sandirokna a·bachengaha aro ia mandeni kosako sakkirangko man·ani ja·man police-rang chargesheet ka·aha.
Police-rangni chargesheet ka·ani ja·man ia case-ko North Garo Hills a·jani Mendipathar-o donggipa POCSO-ni Special Judge B Joshi, bichal ka·aha aro ia mandeko dos donga ine nikani ja·man ia bilsini June 13 tariko, ia mandeko, Indian Penal Code (IPC)-ni Section 354C-ni ning·o bilsisana pattoko donchina aro gong 1000 tangkako dai gamchina rai on·ataha.