Shillong: Meghalaya State Skill Development Society (MSSDS), sal brina Local Training Providers (LTP)-rangna workshop-ko meja Sukrobar salo New Shillong-ni, Mawdiandiang, Institute of Hotel Management-o ong·atanga. Ia workshop-o dam 86 institutes-rangoni sak 119 LTP-rangni gita trainingo bakko ra·anganio, CM Skills Mission-ni ning·o kamrangko ka·anio chu·sokgipa ong·ani cholrangko agan-talate on·nangan baksana work order-ko on·angajolaha.
Employment & Skill Development, Department of Labour-ni Principal Secretary, Challienkhum Songate, ia program-o mongsonggipa sokgipa ong·e jinmana aganprakangengon, agan-skie on·enggipa dolrangko ba training provider-rangko “ songsalo namgipa dingtanganiko rabagipa dolrang,” ine mittelpile aganangenba, iandakgipa training program-rangko ong·atangani, 2025-26 ni gisepo Meghalaya a·dokni silroro namroroanina mongsonggipa ong·e kam ka·giparang ong·ani gimnba aganangaha.
Una agreba, seokgimin sak 17 training provider-rangna Certificate-rangko on·angan baksana MOU-ko, Meghalaya State Skill Development Society (MSSDS)-ni Executive Directive, Jagdish Chelani-ni jakchi pakwate on·angaha aro gipin sak 65 training provider-rangna uamangni kamrangko CM Skill Mission-ni ning·o ta·rake a·bachengatana gita work order-rangko pakwate on·angskaha. Jean a·dokni dingtang dingtang gama ge·ani, badingchiwalani, tourism, sika koani aro rikani bidingo dingtang dingtang block aro songadam nokadamrangoniko nirok simsakanirangko dakna aro dakchakaniko on·na miksonge abachengataha. Ia workshop-o, Employment & Skill Development, Department of Labour-ni Principal Secretary Challienkhum Songate aro MSSDS-ni Executive Director Jagdish Chelani-na agreba, gipin MSSDS-ni dolrang aro Local Training Provider (LTP)-rang dongpae program-o bakko ra·angpaaha.
