SHILLONG: India aro Bangladesh a·songni simarangko ma·mong aro a·dok sorkarirang ta·raken fencing ba sima kaaniko matchotatna krengengoba, a·a nokgiparang an·tangtangni a·arangko on·na sikjaengani a·selan kamrang ja·donggaatako man·na nangenga ine nikna man·aha.
Meghalaya aro Bangladesh a·songni gisepo km 443 simarang donga aro ia simarangoni bang·bata biaprangkon da·o dipet fencing kana man·kujaengachim.
Ia bangki dongkuenggipa simarangko sorkari ta·raken sima kana nangnikengoba, a·a nokgiparang, an·tangtangni a·arangko gimaatna kenenba sorkarina on·na siktokskajaenga.
Indake ong·engon, ia simarangko kapengna man·kujaengani gimin Amlarem-ni MLA Lahkmen Rymbui, an·tangni suk ong·gijaniko parakatenba, kamrangko ta·rake matchotatchina sorkariko didiataha.
A·song damgnini simarang gita niam gri napsrukanirang batroroenganichi a·songna kenchakna nangani ong·engani gimin ia simarangko ta·raken kapengna nangenga ine ua aganaha.
Ia simarang gita Bangladesh a·songoni napsrukbaenggipa manderangko BSF, police, Village Defence Party (VDP) aro dingtang dingtang dolrangba bang·en rim·na man·rongenga.
Meghalaya aro Bangladesh a·songni simarangko fencing kaani matchotsrangkujaengon, ia simarangoni km 337-na baten fencing kamanaha aro da·o km 72-mangni gitasan bangki dongaiaha ine BSF official-rang a·kangskaahachim.
Fencing ba sima kaaniko a·bachengode India a·song ning·o 150 yard ning·osa kaahani a·sel simarango donggipa bang·bata songrangkon Bangladesh a·songchipakna man·angahani gimin ja·mano a·dok sorkari, zero line-o kachina gita National Building Construction Corporation (NBCC)-na ge·etaniko on·ahachim.
Fencing-rangko India a·songchipak 150 yard ning·osa kaahani a·sel bang·bata songrangan India a·songoni watchanggalako man·na kenenba songni nokni manderang aro a·a nokgiparang, an·tangtangni a·arangko sorkarina on·na siktokjaenga aro iani a·selan bangki simarangko fencing kaanio neng·nikanirangko chagrongna nangskaenga.
 |
|