Bishop George Mamalassery-ni siani bilsisa gapaniko gisik ra·e mania

TURA: Sonibar salo Bishop George Mamalassery-ni siani bilsisa gapaniko Tura Diocese-ni gita, Tura-ni Cathedral gilja noko gisik ra·e maniangaha.
Bishop Mamalassery-ni siani salko gisik ra·ani bak gita dingtangmancha Tura-ni Bishop Andrew R Marak, jinma bi·aniko dilangaha aro ia bi·anio, Auxiliary Bishop Jose Chirackal, Claretian Congregation-ni Provincial Rev Fr Joseph Mappilaparambil, dingtang dingtang father-rang aro Tura Diocese-ni bang·bea manderangba bak ra·angtokaha.
Bishop Mamalaserry-ko re·anggipa 2024 bilsini April jao, rang·sitanio neng·nikanirangko man·ahani gimin Holy Cross Hospital-ni Intensive Care Unit (ICU)-o done sannaniko on·engachim indiba saaoni nampilna gita man·jae ua 2024 bilsini July 5 tariko a·gilsakko watangahachim.
Bishop Mamalaserry, jekon Varkey ineba mingachim, 1932 bilsini April 23 tariko, Kerala a·dokni Kalathoor-o Kurian aro Elizabeth Mamalaserry-ni gittamgipa aro chonbatgipa depante ong·e atchiahachim.
Ua bilsi 4 ong·mitingonin songni skulo poraiaha aro 1950 bilsio poraia matchotenba noktangko wate, Madras-ona re·baenba Madras-Mylapore Diocese-ni ning·o donggipa Poonamallee-ni Sacred Heart Seminary-o poraieaha. Poonamallee-o poraiengmitingo ua salgro salaramni gitcham Shillong-Guwahati Archdiocese-o kamko ka·na baseaha.
Bishop Mamalaserry-ko 1960 bilsini April 24 tariko Madras-Mylapore-ni Archbishop Most Rev Louis Mathias DD, pamong songaha.
Pamong songako man·ani ja·man uko Shillong-Guwahati Archdiocese-o missionary ong·e kamko ka·na watataha aro Shillong-ona sokbaon uko Garo Hills-ona Isolni jokataniko gipatna gita watataha.
Tura-ona ua 1960 bilsini August 14 tariko sokbaon uko Fr Anthony Buccieri SDB-ni dakchakgipa pamong ong·na gita seokenba dingtang dingtang songrangona re·e kamko ka·na gita watataha.
1965 bilsio Bishop Mamalaserry-ko Fr Matthew Elanjipuram-ni dakchakgipa pamong ong·e Baghmara-ona watatskaaha aro uanoni ua 1970 bilsio Dalu-ona apjitatako man·skaaha.
1971 bilsini Bangladesh War-o Bishop Mamalaserry, Parish-o katnapgipa East Pakistan-ni manderangko simsak nirokanio mongsonggipa kamko ka·aha.
1979 bilsini February 8 tariko Fr George Mamalaserry-ko Tura-ni skanggipa Bishop dake Pope John Paul II songe on·aha aro 1979 bilsini March 18 tariko uko salgro salaram gimikni Bishop-rang aro hajal kotok manderangni mikkango Bishop-na to nongaha.
Indake ong·engon, Bishop George Mamalassery-ni siani bilsisa gapaniko maniani bak gita Mama Educational & Charitable Trust (MECT)-ko kuliaha.
Bishop Mamalassery-ni siani salko manianio dingtangmancha skanggipa MAMA Scholarship-koba, Rabhagre songni Marsillina R Marak-na on·angaha aro unbaksana T Marengo Scholarship-koba, chubata gadangrango poraiangna sikenggipa chatro chatrirangna aro UPSC-ko sena tarisamsoenggipa chatro chatrirangna a·bachengatjolaha.