TURA: Chokpot-oni Tura-ona dakbagipa ramani Daji dolong nosto ong·angengahani a·sel ian re·ruraenggipa manderangna kenchakna nangani ong·enga ine Garo Students Union (GSU) Chokpot regional unit parakatenba, ia dolongko ta·raken taripile on·china a·dok sorkari aro PWD official-rango dabiangaha.
GSU Chokpot regional unit-ni president Jish A Sangma-ni parakatani gitade, ia dolongni bidingo jolo songdongenggipa manderangni badi ka·anirangko man·soenba GSU-ni membor-rang, ia dolongko nina re·angon, ia dolongo cement-rangni gil·oke aro iron rod-rangni nadoe dongengako nikna man·aha.
“Daji dolongko bilsidok ba bilsisnina skangsan rikahachim aro ia dolong gita gari gorarangni re·ruraani bilsignimangsan ong·kuaiengachim. Indiba ia dolongko rikanirang namjani a·sel da·o dolong nosto ong·na a·bachengengaha aro dolongo rod-rangni nadoe dongako nikna man·engaha. Ian ia rama gita songre songgabatenggipa manderangna namen kenchakna nangani ong·enga,” ine GSU Chokpot regional unit-ni president parakatenba, ia dolong gita re·ruraenggipa manderangni naljokgnina dolongko ta·raken taripile on·china sorkari aro PWD-ko didiataha.